Sunday, November 10, 2013

കാമുകന്‍

നെഞ്ചോടമര്‍ത്തി ഓമനിക്കേണ്ട
കുട്ടിത്തത്തെ കാണുമ്പോള്‍
ഇത്രയും അറപ്പോ, വെറുപ്പോ ... 
അലര്‍ജ്ജിയോ ദേഷ്യമോ...
ചുട്ടും, പുഴുങ്ങിയും കൊല്ലാമോ,
പൈതങ്ങളുടെ കുലം മുടിക്കാമോ ??? 

ഹിംസക്ക് പ്രേരണ നല്‍കുന്നത് 
ഇരയുടെ രൂപമാകുന്നത്  
സംസ്ക്കാര ശൂന്യതയോ ? വംശീയതയോ ? 
അതോ,
പ്രകൃതിയുടെ ശാപം തന്നെയാകുമോ ?

എനിക്കൊന്നുമറിയില്ല പൂമ്പാറ്റേ, 
നിന്റെ കുട്ട്യാളെ നീ തന്നെ നോക്കണം.
ഹത്യാചാരിയാണെങ്കിലും 
ഞാന്‍ നിന്റെ കാമുകന്‍.

Saturday, October 26, 2013

Today's The Hindu Metro Weekend Review about our Painting Exhibition at Kozhikode

Today's The Hindu Metro Weekend Review about our Painting Exhibition (image/carnage-2) at Kozhikode Lalitha Kala Academy Gallery. The Exhibition ends on 27 th Sunday.

Tuesday, September 24, 2013

ഇമേജ്/കാര്‍ണേജ് ചിത്രപ്രദര്‍ശന വാര്‍ത്തകള്‍

ചിത്രകാരനും ഡോ. അജയ് ശേഖറും ഒത്തുചേര്‍ന്ന് 2013 സെപ്തംബര്‍ 18 മുതല്‍ 22 വരെ കൊച്ചി ദര്‍ബാര്‍ ഹാള്‍ ആര്‍ട്ട് സെന്ററില്‍ നടത്തിയ പെയിന്റിങ്ങ് എക്സിബിഷനോടനുബന്ധിച്ച് വിവിധ പത്രമാധ്യമങ്ങളില്‍ പ്രസിദ്ധീകരിച്ച വാര്‍ത്തയുടെ ക്ലിപ്പുകള്‍ താഴെ സൂക്ഷിച്ചിരിക്കുന്നു. ജനയുഗം, മാതൃഭൂമി തുടങ്ങിയ ചില പത്രങ്ങളുടെ ക്ലിപ്പുകള്‍ ലഭിച്ചിട്ടില്ല, ആയതു കൈവശമുള്ളവര്‍ അയച്ചുതന്ന് സഹായിക്കണമെന്ന് അഭ്യര്‍ത്ഥിക്കുന്നു.
മാധ്യമം കൊച്ചി എഡിഷന്‍ വാര്‍ത്ത
മംഗളം വാര്‍ത്ത
കേരള കൌമുദി വാര്‍ത്ത
ടൈംസ് ഓഫ് ഇന്ത്യ റിപ്പോര്‍ട്ട്
വീക്ഷണം
മെട്രോ വാര്‍ത്തയിലെ ഫീച്ചര്‍



ജയ് ഹിന്ദ് ടിവിയിലെ വാര്‍ത്ത
29.9.13 മാധ്യമം വാരാദ്യപ്പതിപ്പിലെ ശ്രീ കെ പി ജയകുമാറിന്റെ ലേഖനം

Saturday, September 21, 2013

"Art attack at Durbar hall gallery"

Times of India report dated 20th Sept. 2013.
Madhyamam Daily report dated 19th Sept. 2013
Mr. KA Francis, The Chairman of Kerala Lalitha kala Academy visiting the "Image /carnage" Exhibition on 20th Sept 2013.
Dr. Ajay Sekher, Academy Chairman KA Francis and Chithrakaran Murali T
 
 
 
Mr. KK Koch
Mr. Sudhesh and Dr. Ajay Sekher
Dr. Ajay Sekher, Mr. Sudhesh, and Sudhesh's daughter Kavery
Chithrakaran, Kavery, Ajay sekher and Sudhesh
Mangalam report dated 20th Sept 2013.
Mr. Kannan Meloth ('idaneram' blog)

Wednesday, September 11, 2013

എക്സിബിഷന്‍ കൊച്ചി, ദര്‍ബാര്‍ ഹാളില്‍, 2013 സെപ്തംബര്‍ 18-22

 
2013 സെപ്തംബര്‍ 18 മുതല്‍ 22 വരെ ഡോ. അജയ് ശേഖറിന്റേയും ചിത്രകാരന്റേയും പുതിയ ചിത്രങ്ങളുടെ ഒരു എക്സിബിഷന്‍, കൊച്ചി ദര്‍ബാര്‍ ഹാളില്‍ (ഗലറി - ഇ, ഒന്നാം നില)നടത്തപ്പെടുന്ന വിവരം എല്ലാ നെറ്റ് സുഹൃത്തുക്കളേയും, അഭ്യുദയകാംക്ഷികളേയും സന്തോഷപൂര്‍വ്വം അറിയിച്ചുകൊള്ളുന്നു. 18ആം തിയ്യതി വൈകീട്ട് 5.30 ന് പ്രൊഫസര്‍ എം.കെ. സാനു മാഷ് പ്രദര്‍ശനം ഉദ്ഘാടനം ചെയ്യുന്നതായിരിക്കും. തദവസരത്തില്‍ കൊച്ചി ദര്‍ബാര്‍ ഹാളിലെത്തിച്ചേരാന്‍ സൌകര്യമുള്ള സുഹൃത്തുക്കള്‍ ഉദ്ഘാടന ചടങ്ങിലും തുടര്‍ന്നുള്ള പ്രദര്‍ശന ദിവസങ്ങളിലും സ്നേഹസാന്നിദ്ധ്യമായി ഈ എക്സിബിഷനില്‍ പങ്കെടുക്കാനായി ക്ഷണിച്ചുകൊള്ളുന്നു. കൂടുതല്‍ അറിയാന്‍ :
ഡോ. അജയ് ശേഖറിന്റെ ഇംഗ്ലീഷ് ബ്ലോഗിലുള്ള പോസ്റ്റ് ലിങ്ക്.
 
ബ്ലോഗില്‍ നിന്നു ലഭിച്ച വായനക്കാരുടെ പിന്തുണയും അഭിപ്രായങ്ങളും കാരണം 20 വര്‍ഷം മുന്‍പ് ഉപേക്ഷിച്ചിരുന്ന ചിത്രകലയിലേക്ക് മടങ്ങാനായതിന്റെ ഫലമായിക്കൂടി ഈ പ്രദര്‍ശനത്തെ ചിത്രകാരന്‍ കാണുന്നതിനാല്‍ , ഈ നവ മാധ്യമത്തെ നിര്‍മ്മിച്ച് നവീകരിച്ച് വിശാലമാക്കിക്കൊണ്ടിരിക്കുന്ന എല്ലാ സുമനസ്സുകളോടും ഈ അവസരത്തില്‍ നന്ദി പറഞ്ഞുകൊള്ളുന്നു. ഇതോടൊപ്പം,എക്സിബിഷനായി തയ്യാറാക്കിയിരിക്കുന്ന ക്ഷണക്കത്ത്, പോസ്റ്റെര്‍, ബ്രോഷര്‍ തുടങ്ങിയവയുടെ ഇമേജ് ഫയലുകള്‍ കൂടി ചേര്‍ത്തിട്ടുണ്ട്. മാധ്യമ സുഹൃത്തുക്കളും, മാധ്യമ ബന്ധുക്കളും ഈ ഗ്രൂപ്പ് എക്സിബിഷനെക്കുറിച്ചുള്ള വിവരങ്ങളും കാഴ്ച്ചപ്പാടുകളും ജനങ്ങളിലെത്തിച്ച് എക്സിബിഷന്‍ വിജയകരമാക്കാന്‍ സഹായിക്കണമെന്ന് അഭ്യര്‍ത്ഥിച്ചുകൊള്ളുന്നു.
പ്രദര്‍ശനത്തില്‍ ഉള്‍പ്പെടുത്തിയിട്ടുള്ള ചിത്രകാരന്റെ ചിത്രങ്ങള്‍ കാണുന്നതിനും കോപ്പിയെടുക്കുന്നതിനും പ്രദര്‍ശനത്തെക്കുറിച്ചുള്ള അപ്ഡേറ്റുകള്‍ അറിയുന്നതിനും:
1) ചിത്രകാരന്റെ പെയിന്റിങ്ങ് ബ്ലോഗ്
2) ചിത്രകാരന്‍ ഫേസ് ബുക്ക് പേജ് (സൈന്‍ ഇന്‍ ചെയ്യാതെത്തന്നെ തുറന്നു കാണാനാകും)
3) ചിത്രകാരന്റെ വെബ് സൈറ്റ്
4) ഗൂഗ്ഗിള്‍ പ്ലസ്
5) മുരളി ടി കേരള ( ഫേസ് ബുക്ക് )
 

പോസ്റ്റര്‍

ക്ഷണക്കത്ത്

ബ്രോഷന്‍ ഇന്നര്‍ പേജ് (തീം നോട്ട്)

ബ്രോഷര്‍ ഔട്ടര്‍ പേജ്

Saturday, August 10, 2013

സ്ത്രീ വിരുദ്ധതയുടെ സത്യമറിയാന്‍...

പൂമുഖം
സ്ത്രീ വിരുദ്ധതയും സ്ത്രീകള്‍ക്കെതിരായ വിവേചനവും തീര്‍ച്ചയായും അപമാനകരമായ ഒരു അവസ്ഥയാണ്. അത് സാമൂഹ്യവിരുദ്ധവും, മനുഷ്യ കുലത്തിന്റെ തന്മാത്രതലത്തില്‍ ബാധിക്കുന്ന അനാരോഗ്യ ചിന്തയുമാണ് എന്ന കാര്യത്തില്‍ സംശയമില്ല. അതുകൊണ്ടുതന്നെ, സ്ത്രീവിരുദ്ധത സാംസ്ക്കാരിക-വിദ്യാഭ്യാസ ഇടപെടലുകളിലൂടെ ഇല്ലാതാക്കേണ്ടത് ഏതൊരു സമൂഹത്തിന്റേയും വളര്‍ച്ചക്ക് അനിവാര്യമാണ്. ഇങ്ങനെ സംസ്ക്കരിക്കപ്പെട്ടതെന്നോ നവീകരിക്കപ്പെട്ടതെന്നോ കരുതാവുന്ന സമൂഹത്തില്‍ വീണ്ടും, സ്ത്രീവിരുദ്ധത ഒരു അരാഷ്ട്രീയ ഫാഷനെപ്പോലെയോ തിന്മയുടെയും ജീര്‍ണ്ണതയുടേയും കടന്നുകയറ്റമായോ തിരിച്ചുവരാതിരിക്കാനുള്ള ഭരണകൂട നിയമപരിപാലന വ്യവസ്ഥയും സാംസ്ക്കാരിക പൊതുബോധവും ജാഗ്രതയോടെ നിലനിര്‍ത്തേണ്ടതുമുണ്ട്. പുരുഷന്മാര്‍ക്ക് ലഭ്യമാകുന്ന എല്ലാ അവസരങ്ങളും വിവേചനമോ , മാനസിക വിഷമമോ ഇല്ലാതെ, തുല്യതയോടും അന്തസു കുറയാതെയും സ്ത്രീകള്‍ക്ക് സ്വായത്തമാക്കാന്‍ കഴിയുന്നവിധമുള്ള നീതിബോധം നടപ്പിലാക്കാന്‍ ഏതു പരിഷ്കൃത സമൂഹവും അതിന്റെ ഗവണ്മെന്റും പ്രതിജ്ഞാബദ്ധരുമായിരിക്കണം. ഇത്രയുമാണ് ചിത്രകാരന്റെ സ്ത്രീവിരുദ്ധതക്കെതിരായ ആദര്‍ശപരമായ നിലപാട്. ഈ നിലപാട് സ്ത്രീ പക്ഷ ചിന്തകരും, മാനവിക ചിന്തകരും ഒരുപോലെ സ്വീകരിക്കുമെന്നാണ് പ്രതീക്ഷിക്കുന്നത്.

മറുപുറം
 എന്നാല്‍, അത്തരമൊരു വിശാല സാമൂഹ്യബോധമോ ജനാധിപത്യ മര്യാദയോ പോലുമില്ലാത്തതും, സ്വന്തം പൌരന്മാരിലെ 70% ത്തിലേറെവരുന്നവരെ മനുഷ്യരായിപ്പോലും പരിഗണിക്കാന്‍ ജാതി-മത-വര്‍ണ്ണ-വര്‍ഗ്ഗ വിശ്വാസങ്ങളാല്‍ വിമുഖവുമായ, തികച്ചും  മനുഷ്യത്വ വിരുദ്ധമായ ഒരു സമൂഹം തങ്ങളുടെ രാജ്യത്തെ, വിദ്യാസമ്പന്നരായ സ്ത്രീകള്‍ക്കു മാത്രമായി മുകളില്‍ പറഞ്ഞതുപോലുള്ള ഒരു “അണുവിമുക്ത സ്ത്രീസൌഹൃദ ഫസ്റ്റ് ക്ലാസ് എ.സി. കമ്പാര്‍ട്ടുമെന്റ് ” സ്ത്രീവര്‍ഗ്ഗ സുരക്ഷക്കായി എകെ.47 ഏന്തിയ കമാന്റോ സംഘത്തിന്റെ അകമ്പടിയോടെ, സാമൂഹ്യ ക്ഷേമവകുപ്പിന്റെ “കാളവണ്ടി”യുടെ “മുന്നില്‍” കെട്ടാന്‍ നിര്‍മ്മിച്ചു നല്‍കണമെന്ന് സ്ത്രീവിരുദ്ധതയെ തുടച്ചുനീക്കുന്നതിനായി ഓണ്‍ലൈനിലായാലും പരമ്പരാഗത മാധ്യമങ്ങളിലായാലും ആവശ്യപ്പെടുന്നത്   ചെറിയ രീതിയിലുള്ള അന്ധതയോ, അജ്ഞതയോ, സാമൂഹ്യവിരുദ്ധതയോ അല്ല. അതിനായി മുറവിളി കൂട്ടുന്നവര്‍ സ്ത്രീവര്‍ഗ്ഗ ചിന്തകരായാലും, സ്ത്രീപക്ഷപുരുഷന്മാരായാലും, “ഫെമിനിസ്റ്റു”കളായാലും, ഭരണകൂടമായാലും, മറ്റാരായാലും അത് പ്രത്യക്ഷത്തില്‍ നീതിയെന്ന് ഉപരിവര്‍ഗ്ഗത്തിനും, നമുക്കിടയില്‍ സുലഭമായുള്ള ഉപരിപ്ലവ ബുദ്ധികള്‍ക്കും തോന്നുമെങ്കിലും,  നീതിബോധത്തെ വ്യഭിചരിക്കുന്ന അശ്ലീലതയായി മാത്രമേ മനുഷ്യസമൂഹത്തിലെ വര്‍ഗ്ഗ പക്ഷങ്ങളില്ലാത്ത ചിന്തകര്‍ക്ക് നോക്കിക്കാണാനാകു.

അവരിലും സ്ത്രീകളില്ലേ ?
വലിയ വിവേചനങ്ങളൊന്നും നിലവിലില്ലാത്ത സമൂഹങ്ങളില്‍ മനുഷ്യന്‍ ആണോ പെണ്ണോ എന്ന് തിരിച്ചറിവു നേടി വളര്‍ന്നു വലുതായി, സമൂഹ മധ്യത്തിലേക്ക് ജീവിതസമരത്തിനായി ഇറങ്ങുമ്പോഴാണ് , മനോവിഷമമുണ്ടാക്കുന്നതും അപമാനകരവുമായ സ്ത്രീ-പുരുഷവിവേചനം അന്യരില്‍ നിന്നും ഒരു വ്യക്തി എന്ന നിലയില്‍ നമുക്ക് അനുഭവിക്കാന്‍ സാധ്യതയുള്ളത്. (ഗര്‍ഭസ്ഥശിശുവിന്റെ ലിംഗനിര്‍ണ്ണയം നടത്തുന്നതിലൂടെയുള്ള സ്ത്രീ വിവേചനം അതിനെ വൈകാരികമായി കാണുന്നവര്‍ സ്ത്രീവിരുദ്ധമായി കാണുമെങ്കിലും മറ്റൊരു സാമൂഹ്യ വിഷയമാണ്, അതിവിടെ ചര്‍ച്ചചെയ്യുന്നില്ല.) എന്നാല്‍, ജാതി-മത-വര്‍ണ്ണ-വര്‍ഗ്ഗ വിവേചനം കൊടുമ്പിരികൊള്ളുന്ന ഒരു സമൂഹത്തില്‍ കുട്ടി ആണായാലും പെണ്ണായാലും തന്റെ അച്ഛനമ്മമരാകാന്‍ കൊതിക്കുന്ന സ്ത്രീ പുരുഷന്മാര്‍ക്ക് പരസ്പരം പ്രേമം തോന്നുന്നതുമുതല്‍, തുടര്‍ന്ന് വിവാഹിതരാകുമ്പൊഴും, എങ്ങനെയെങ്കിലും വിവാഹിതരായി  ഗര്‍ഭപാത്രത്തില്‍ ബീജ നിക്ഷേപം നടത്തുമ്പോഴും, പിറന്നു വീഴുമ്പോഴും, മണ്ണിലിറങ്ങിയതുമുതല്‍ ആജീവനാന്തവും വിവേചനത്തിനും അനീതിക്കും പാത്രീഭവിക്കാനുള്ള സാമൂഹ്യ സാഹചര്യം അവിടെ നിലവിലുണ്ട്. ചെറിയൊരു അശ്ലീല ചുവയോടുള്ള തമാശയോ, തുറിച്ചുനോട്ടമോ,(അവയെയൊന്നും ന്യായീകരിക്കുകയല്ല) സ്ത്രീയാണെന്ന പേരിലുള്ള അവഗണനയോ ഒന്നുമല്ല, നിനക്കിവിടെ ജീവിക്കാന്‍ എന്തവകാശമെന്ന വംശഹത്യയോളം നീചമായ വംശീയ ആക്രമണമാണ് അവര്‍ നേരിടേണ്ടിവരിക.  ഇതൊരു പരമമായ സത്യമാണ്. ഏതാണ്ട് 70% വരുന്ന ഈ ജനവിഭാഗത്തിലെ പകുതിയോളം വരുന്ന, കന്നുകാലികളോളം പോലും പ്രാധാന്യമില്ലാത്ത  സ്ത്രീകളെ, നമ്മുടെ കുലിന സ്ത്രീകള്‍ക്കായി നിര്‍മ്മിക്കണമെന്ന് ഫെമിനിസ്റ്റുകളും, മറ്റു വരേണ്യ “മനുഷ്യാവകാശ” ചിന്തകരും ആവശ്യപ്പെടുന്ന “അണുവിമുക്ത സ്ത്രീസൌഹൃദ ഫസ്റ്റ് ക്ലാസ് എ.സി. കമ്പാര്‍ട്ടുമെന്റ് ” ല്‍ കയറാന്‍ നാം അനുവദിക്കുമോ ? അഥവ അനുവദിച്ചാല്‍ തന്നെ അവരെ അറപ്പോടെ നോക്കുമോ ??  ജാതി-മത-വര്‍ണ്ണ-വര്‍ഗ്ഗ ചിന്തയുടെ സവര്‍ണ്ണ വംശീയത വിരാടരൂപം പൂണ്ടു നില്‍ക്കുന്ന ഒരു രാജ്യത്ത് മനുഷ്യത്വത്തിനു നേരെയുള്ള വിവേചനമില്ലാതിരിക്കുക എന്നത് അസംഭവ്യമാണ് എന്ന് ചിത്രകാരന്‍ സാക്ഷ്യപ്പെടുത്താതെതന്നെ ആര്‍ക്കും ബോധ്യമാകുന്ന വസ്തുതയാണ്. പക്ഷേ, നമ്മുടെ സ്വാര്‍ത്ഥത കാരണം നാം സവര്‍ണ്ണ വംശീയതയുടെ വിരാടരൂപത്തെ നോക്കാറില്ലെന്നു മാത്രം !   ജാതീയതയുടെ മഹത്വവല്‍ക്കരണമായ “സവര്‍ണ്ണത”യെ അഭിമുഖീകരിക്കാതെ നമുക്ക് ഈ അശ്ലീല ജനാധിപത്യത്തെ സമഗ്രമാനവിക ജനാധിപത്യമായി നവീകരിക്കാനാകില്ല എന്ന് ചുരുക്കം.

ചിത്രകാരന്‍ ദളിത പക്ഷക്കാരനാണോ ?
ചിത്രകാരന്‍ ദളിതര്‍ക്കു വേണ്ടി മാത്രം വാദിക്കുന്നു, സ്ത്രീ വിവേചനങ്ങള്‍ക്കെതിരെ ശരിയായ നിലപാടെടുക്കുന്നില്ല എന്നിങ്ങനെയുള്ള പരാമര്‍ശങ്ങള്‍ ധാരാളമായി കേട്ടതുകൊണ്ടു പറയുകയാണ്. ചിത്രകാരന്‍ ഒരു പക്ഷത്തിലും നില്‍ക്കാറില്ല. ഒരു വര്‍ഗ്ഗത്തിലും, പാര്‍ട്ടിയിലും, സംഘടനയിലും തളക്കാനാകില്ല.

 ചിത്രകാരന്‍ ദളിത പക്ഷവാദിയാണെന്ന് ആക്ഷേപിക്കുന്ന സ്ത്രീ പക്ഷപാതിയുടെ പോലും മനസിലിരുപ്പ് ദളിത പക്ഷത്തിലേക്ക് ചേര്‍ത്തു നിര്‍ത്തുന്നതിലൂടെ ചിത്രകാരനെ പാര്‍ശ്വവല്‍ക്കരിക്കാനാകുമെന്ന സവര്‍ണ്ണ സിദ്ധാന്തമാണ്. ആദ്യം ശൂദ്രനെന്ന് മുദ്രയടിച്ചാല്‍ ചെവിയില്‍ ഉരുക്കിയ ഇയ്യമൊഴിക്കുകയോ, കൊല്ലുകപോലുമോ ചെയ്യാമായിരുന്നു. ആരും ചോദിക്കില്ല. ശൂദ്രന്‍ സവര്‍ണ്ണതയുടെ ഗുണ്ടാ പട്ടാളമായതോടെ അവര്‍ണ്ണരെ നശിപ്പിക്കുന്നത് ഒരു പുണ്യ പ്രവര്‍ത്തിയായി, അതിനായി അവരെ അസുരനായോ, രാക്ഷസനായോ, അഹങ്കാരിയെന്നോ മുദ്രകുത്തിയാല്‍ മതിയെന്നായി. ഏതാനും ദശാബ്ദങ്ങള്‍ക്കു മുന്‍പ് നക്സല്‍ മുദ്രക്കായിരുന്നു ഡിമാന്റ്. നക്സല്‍ മുദ്രവീണാല്‍ മീഡിയ തന്നെ ആദ്യം ചിത്രവധം ചെയ്തോളും. പിന്നെ ഏതെങ്കിലും രാമചന്ദ്രന്‍ നായരോട് വെടി പൊട്ടിച്ച് നക്സല്‍ വധത്തിന്റെ വീര പരിവേഷം വീതംവച്ചാല്‍ മതി. വര്‍ത്തമാന കാലത്ത്, സവര്‍ണ്ണതയുടെ ഹിറ്റ് ലിസ്റ്റിലെ നമ്പര്‍ വണ്‍ കൊല്ലപ്പെടേണ്ടവരായതും, ക്ഷത്രിയാന്തകരായ പരശുരാമന്മാരുടെ വെണ്മഴുവില്‍ രക്ത്ധാര നടത്തിയിരുന്നവരുമായ “മനുഷ്യജാതി”യെന്നൂറ്റം കൊണ്ടിരുന്ന “അവര്‍ണ്ണര്‍” സവര്‍ണ്ണതയുടെ കാക്കി പോലീസായി മാറിയതിനാലും, മാറ്റിയെടുക്കേണ്ടതിനാലും മുസ്ലീങ്ങളും ദളിതരുമാണ് ഇപ്പോള്‍ പ്രശ്നകാരികള്‍. മുസ്ലീമിനെ ഭീകരനോ രാജ്യദ്രോഹിയോ ആയി എളുപ്പം മുദ്രകുത്താം. മുദ്രകുത്തിക്കഴിഞ്ഞാല്‍ ജനം വിളിച്ചു പറയും “കൊല്ലവനെ” പിന്നെ ഒരു ഏറ്റു മുട്ടല്‍ അറേഞ്ച് ചെയ്തോ ഒരു കൂട്ടക്കൊലയിലൂടെയോ കൊല്ലുകയോ വിചാരണ തടവുകാരനായി ആജീവനാന്തം തടവിലിടുകയോ ചെയ്യാം. ഇതു തന്നെയാണ് ദളിതരുടേയും അവസ്ഥ. അവരുടെ കൃഷിസ്ഥലം കാറ്റാടി പാടമാക്കി, ജീവിതം വഴി മുട്ടിച്ച്, പട്ടിണിക്കിട്ട് കൊന്നൊടുക്കാം, അല്ലെങ്കില്‍, മാവോയിസ്റ്റ്  ബന്ധം ആരോപിക്കേണ്ട ആവശ്യമേയുള്ളു. പിന്നെ, അവനെ തിരിഞ്ഞു നോക്കുന്ന സവര്‍ണ്ണന്‍ പോലും മാവോയിസ്റ്റ് അനുഭാവിയായി വേട്ടയാടപ്പെടും.

സ്വന്തം സഹോദരങ്ങളായ പൌരന്മാരെയാണ് കൊടും കുറ്റവാളികളായി കൃഷി ചെയ്ത് വളര്‍ത്തുമ്പോലേ വളര്‍ത്തി, കൊന്നും, കൊല്ലാക്കൊല ചെയ്തും സവര്‍ണ്ണ സാംസ്ക്കാരികത ആനന്ദിക്കുന്നതെന്ന സത്യം കാണാന്‍ കാഴ്ച്ച ശക്തിയില്ലാത്തവരാണ്, അതെല്ലാം അവിടെ നില്‍ക്കട്ടെ, ഫെമിനിസ്റ്റ് ആപ്പീസില്‍ നിന്നും “സ്ത്രീ വിരുദ്ധനല്ല” എന്ന സര്‍ട്ടിഫിക്കറ്റ് നേടിയതിനു ശേഷമേ ചിത്രകാരന്‍ സാമൂഹ്യ അസമത്വത്തെക്കുറിച്ച് ഉരിയാടാവു എന്ന് കല്‍പ്പിക്കുന്നത് !!!

സ്ത്രീപക്ഷ അച്ചികളുടെ പിന്നില്‍ ആരാണ് ?
ചിത്രകാരന്റെ എഴുത്തുപുരകളില്‍ വന്ന് മുന്നറിയിപ്പു ബോര്‍ഡുകള്‍ അവഗണിച്ച് പോസ്റ്റുകള്‍ വായിക്കുന്ന സവര്‍ണ്ണ വംശീയ വാദികളുടെ ആസനത്തിലെ ജാതിവൃണങ്ങള്‍ പൊട്ടിയൊലിക്കാനിടയുണ്ടെന്ന്  അവിടെത്തന്നെ എഴുതി വച്ചിട്ടുള്ളതാണല്ലോ. പൊട്ടിയൊലിക്കുന്ന ജാതി വാലിലെ വൃണങ്ങളുമായി തങ്ങളുടെ മഹനീയമായ സവര്‍ണ്ണ തറവാട്ടിലേക്ക് ഓടിച്ചെന്നാല്‍ കുലിന അച്ചികള്‍ ചൂലുകെട്ടുമായി ഒരു കൈ നോക്കാനായി “ചിത്രകാര വധ” വാരാചാരണം ആചരിക്കുന്നത് അസ്വാഭാവികമല്ല എന്നാണു മനസ്സിലാക്കേണ്ടത്. അതല്ലാതെ, വഴിയില്‍ ഏതെങ്കിലും ഒരുത്തന്‍ വരുന്നോ എന്ന് ചോദിച്ചതിനും, കൂടെ ജോലി ചെയ്യുന്ന പുരുഷ പ്രജകള്‍ പുരുഷ തമാശകള്‍ പറഞ്ഞ് ഒറ്റപ്പെടുത്തുന്നതിനും... അതുപോലുള്ള ഒത്തിരി വ്യക്തിഗത ദുരനുഭവങ്ങള്‍ക്കെല്ലാം കാരണം പുരുഷന്റെ “മെയില്‍ ഷോവനിസ്റ്റ് ” (?? എന്തരോ എന്തോ??) മനോഭാവമാണെന്നും, മലയാളം സോഷ്യല്‍ നെറ്റ് വര്‍ക്കില്‍ ഒരു മാതൃകാ “മെയില്‍ ഷോവനിസ്റ്റ് പിഗ്ഗായി” അച്ചികളുടെ സംബന്ധക്കാരാരോ ചൂണ്ടിക്കാട്ടിയ ചിത്രകാരനെ അപമാനിച്ചും, മാനസികമായി വിഷമിപ്പിച്ചും പോസ്റ്റുകളുടേയും കമന്റുകളുടേയും ഒരു പ്രക്ഷോപം സംഘടിപ്പിച്ചാല്‍ സ്ത്രീപക്ഷ രാഷ്ട്രീയം വിജയിക്കുമെന്ന് ഇവര്‍ വിശ്വസിക്കുന്നുണ്ടായിരിക്കും. ഏവിടെയൊ കിടക്കുന്ന നിരപരാധിയായ ചിത്രകാരനോട് അരിശം തീര്‍ത്ത സ്ത്രീ പക്ഷക്കാരോടെന്തു പറയാന്‍ !! പെങ്ങന്മാരെ ഈ ക്രൂരത മറ്റാരോടും ചെയ്യരുത്. :)
..........................................
ഗൂഗിള്‍ പ്ലസ്സില്‍ സ്ത്രീപക്ഷക്കാരുടേയും സവര്‍ണ്ണ വംശീയവാദികളുടെയും നേതൃത്വത്തില്‍ നടന്ന ചിത്രകാരവധം ആട്ടക്കഥകളുടെ പോസ്റ്റ് ലിങ്കുകള്‍ സമാഹരിച്ചിരിക്കുന്ന ചിത്രകാരന്റെ പോസ്റ്റിലേക്കുള്ള ലിങ്ക് : ഇവിടെ ക്ലിക്കുക

ഒരു അഭ്യര്‍ത്ഥന
സത്യമായും പറയുകയാണ്, ചിത്രകാരന് “ഫെമിനിസ”ത്തെക്കുറിച്ച് ഒരു അറിവുമില്ല. ചിത്രകാരന്‍ അവരുടെ മാനിഫെസ്റ്റോയോ ലക്ഷണ ശാസ്ത്രങ്ങളോ പഠിച്ചിട്ടില്ല, പഠിക്കാനുള്ള ഇംഗ്ലീഷ് പരിജ്ഞാനവും ചിത്രകാരനില്ല. കമ്മ്യൂണിസ്റ്റുകളെ അറിഞ്ഞത് ദസ് ക്യാപ്പിറ്റലോ അവരുടെ മറ്റു പുരാണ ഗ്രന്ഥങ്ങളോ വായിച്ചിട്ടല്ല, മുസ്ലീമിനെ അറിഞ്ഞത് കൊറാന്‍ മൂലവും മലയാള പരിഭാഷയും വായിച്ചിട്ടല്ല, എത്ര മോശക്കാരനാണെന്ന് ആക്ഷേപിച്ചാലും മലയാളമല്ലാത്ത ഒരു ഭാഷയിലല്ലാതുള്ള വിജ്ഞാനം വായിച്ചു മനസ്സിലാക്കാനുള്ള ശേഷിയില്ല എന്നതാണു കാര്യം. മലയാളം തന്നെ കടുപ്പമേറിയാല്‍ വായിക്കില്ല. അടുത്തകാലത്ത് അപവാദമായി ആകെ വായിച്ചത് , ആടു ജീവിതവും, നളിനി ജമീലയുടെ ആത്മകഥയും, നമ്മുടെ കുമാര സംഭവവുമാണ് :)  ആരെങ്കിലും വായിച്ച് രത്നച്ചുരുക്കം പറഞ്ഞു തന്നാല്‍ കേള്‍ക്കും. ഇതൊന്നുമൊരു യോഗ്യതയല്ലെന്നറിയാം. അതുകൊണ്ടു പറയുകയാണ് താഴെ കൊടുത്ത വാക്കുകള്‍ ലളിതമായി മലയാളത്തില്‍ പറഞ്ഞു തരുന്ന വല്ല ലേഖനങ്ങളുമുണ്ടെങ്കില്‍ ലിങ്ക് തന്ന് സഹായിക്കണം.

1) മെയില്‍ ഷോവനിസ്റ്റ് പിഗ്ഗ് (ഇതിന്റെ ലക്ഷണ ശാസ്ത്രമാണ് അറിയേണ്ടതായിട്ടുള്ളത്. ചിത്രകാരന്‍ എത്രത്തോളം ഈ വിശേഷണത്തിന് അനുരൂപനായിരിക്കുന്നു എന്ന് കണ്ടു പിടിക്കാനാകണം. മോശമാണെങ്കില്‍ തിരുത്തണമെന്നുണ്ട്. ഒരിക്കലും ഒരു മനുഷ്യവിരോധിയാകരുതല്ലോ. )
2) ഫെമിനിസം
3) ബൂര്‍ഷ്വ, പെറ്റി ബൂര്‍ഷ്വ
4) ക്വാണ്ടം തിയറി (കോണ്ടം തിയറിയല്ല, പ്രപപഞ്ച സംങ്കല്‍പ്പത്തെയൊക്കെ ശാസ്ത്രീയമായി സിദ്ധാന്തിക്കുന്ന ഐന്‍സ്റ്റീന്റേയോ മറ്റോ ഒരു തിയറിയുണ്ടല്ലോ, അത്. )

Tuesday, July 16, 2013

നമ്മുടെ ക്ഷേത്രങ്ങളിലെ അയിത്താചരണവും മനുഷ്യാവകാശ കമ്മീഷനും

ഇന്നത്തെ (16.07.2013) മാതൃഭൂമി കണ്ണൂര്‍ എഡിഷന്‍ ഒന്നാം പേജ് വാര്‍ത്ത.
ക്ഷേത്രങ്ങള്‍ ഇന്നും അയിത്താചരണത്തിന്റേയും ജാതീയ വിവേചനത്തിന്റേയും പരിപാവന വേദികളായി തുടരുകയാണ് എന്ന സത്യം തുറന്നുകാട്ടിയ മനുഷ്യാവകാശ കമ്മീഷനും, മനുഷ്യാവകാശ കമ്മീഷനു മുന്നില്‍ ഈ വിഷയം പരാതിയായി സമര്‍പ്പിച്ച മാങ്ങാട് സ്വദേശി, പുത്തലത്ത് വീട്ടില്‍ ചന്ദ്രന്‍ അവര്‍കളോടും, ഈ വാര്‍ത്ത ഒന്നാം പേജില്‍ അര്‍ഹമായ പ്രാധാന്യത്തോടെ പ്രസിദ്ധീകരിച്ച മാതൃഭൂമിയോടും ആദ്യമായി നന്ദി പറയേണ്ടതുണ്ട്. സത്യത്തില്‍ നമ്മുടെ ക്ഷേത്രങ്ങളില്‍ നിറഞ്ഞാടുന്ന അയിത്താചരണത്തിന്റെ ദുര്‍ഭൂതങ്ങളെക്കുറിച്ച് നാം അറിയാതിരിക്കുകയാണ്. ക്ഷേത്ര ദര്‍ശനത്തിനായി ദീര്‍ഘനേരം ക്യൂവില്‍ നിന്ന് ഒരു കൃത്യമായ രേഖയിലൂടെ മാത്രം സഞ്ചരിക്കുന്ന സാധാരണ ഭക്തന്മാര്‍ക്ക് അയിത്തത്തിന്റെ ആത്മാഭിമാനക്ഷതം അനുഭവപ്പെടാനിടയില്ല. എന്നാല്‍ കുറച്ചൊരു നിരീക്ഷണ ബുദ്ധിയും, പ്രബുദ്ധതയും മാനവിക ബോധവും ആര്‍ജ്ജിച്ചിട്ടുള്ള ആര്‍ക്കും ക്ഷേത്രങ്ങള്‍ക്കകത്തേക്ക് കാലുകുത്താനാകാത്തവിധം സവര്‍ണ്ണ വിവേചനം ഭീഭത്സമായി നിലനില്‍ക്കുന്നുണ്ട്.  ജീവിതത്തിലൊരിക്കലും മറക്കാനാവാത്തവിധമുള്ള ആത്മാഭിമാനത്തിനേറ്റ മുറിപ്പാടുകളായി മാത്രമേ ക്ഷേത്രങ്ങളില്‍ നിന്നും പുറത്തിറങ്ങാനാകു. ക്ഷേത്ര ദര്‍ശനത്തിനായി അനുവദിക്കപ്പെട്ട വഴികളിലൂടെയല്ലാതെ, കലാ-ചരിത്ര താല്‍പ്പര്യങ്ങളുടെ അന്വേഷണ ബുദ്ധിയോടെ ചെറുതായൊന്നു വഴിമാറി  നിന്നാല്‍ പോലും ബ്രാഹ്മണ മന്ത്രവാദികള്‍ നമുക്ക് മുന്നില്‍ വന്ന് പൊട്ടന്‍ കളി നടത്തുന്നത് കാണാനാകും. മന്ത്ര-തന്ത്രവാദികളായ ഈ കുറ്റിച്ചൂലുകള്‍ക്ക് അയിത്ത ബോധമുണ്ടാകാന്‍ നാം ശ്രീ കോവിലിനകത്ത് കയറുകയൊന്നും വേണ്ട. ചിത്രകാരന്‍ ഏതാണ്ട് ഒരു 20 വര്‍ഷം മുന്‍പ് പെരിന്തല്‍മണ്ണയിലെ പ്രശസ്തമായ തിരുമാന്താംകുന്ന് കാവ് ക്ഷേത്ര സന്ദര്‍ശനം നടത്തിയപ്പോള്‍ ചെറിയൊരു മാര്‍ഗ്ഗ ഭ്രംശത്തിന്റെ പേരില്‍ മനോവേദന അനുഭവിക്കേണ്ടി വന്നിട്ടുണ്ട്. ക്ഷേത്ര ദര്‍ശനത്തിനായി പൊതുവെ ഉപയോഗിക്കുന്ന കിഴക്ക്, വടക്ക് നടകള്‍ക്ക് പകരം തെക്ക് ഭാഗത്തുകണ്ട വാതിലിലൂടെയാണെന്നു തോന്നുന്നു ചിത്രകാരന്‍ ക്ഷേത്രത്തിനകത്തേക്ക് പ്രവേശിക്കാന്‍ തുനിഞ്ഞത്. കുട്ടിക്കാലത്ത് അമ്മയോടൊപ്പം ക്ഷേത്ര ദര്‍ശനം നടത്തിയപ്പോള്‍ കണ്ട ചുവര്‍ ചിത്രങ്ങള്‍ ഒന്നു കൂടി കണ്ട് ഓര്‍മ്മ പുതുക്കുക എന്ന ഉദ്ദേശമേ ക്ഷേത്ര ദര്‍ശനത്തിനുണ്ടായിരുന്നുള്ളു. ക്ഷേത്രത്തിനകത്തേക്ക് കയറിയതും, വളരെ ദൂരെ നില്‍ക്കുന്ന പൂണൂലിട്ട മന്ത്രവാദിയായ ഒരു ചെറുപ്പക്കാരന്‍ ഒച്ചയും ബഹളവുമായി ആംഗ്യവിക്ഷേപത്തോടെ നില്‍ക്കാനാവശ്യപ്പെടുന്നു !!! ക്ഷേത്ര ദര്‍ശനത്തിനായി മേല്‍ വസ്ത്രം ഉരിയണമെന്ന ആചാരമടക്കം മനസില്ലാ മനസ്സോടെ അനുസരിച്ച് ക്ഷേത്രത്തില്‍ പ്രവേശിക്കുന്ന ചിത്രകാരന്‍ തെറ്റൊന്നും ചെയ്യുന്നില്ലെന്ന ഉത്തമ വിശ്വാസമുള്ളതിനാല്‍ നമ്പൂരിചെക്കന്റെ കഥകളിയുടെ ഉദ്ദേശം പെട്ടെന്നു മനസ്സിലായില്ല. പിന്നേയും മുന്നോട്ടു നീങ്ങിയപ്പോള്‍ ഇയ്യാളുണ്ട് കൈകൊണ്ട് നില്‍ക്കാനാവശ്യപ്പെട്ട് പിന്നോട്ട് നീങ്ങുന്നു. നിശ്ചിത അകലത്തിലുള്ള അയിത്തബോധത്തിന്റെ പേരിലാണ് മന്ത്രവാദി പിന്നോട്ടു നീങ്ങുന്നതെന്ന് ബോധ്യമായപ്പോള്‍ നിന്നു. എന്താ കാര്യമെന്നന്വേഷിച്ചപ്പോള്‍ അത് ബ്രാഹ്മണര്‍ക്കുള്ള വഴിയാണെന്നു മനസ്സിലായി. വഴി ‘അശുദ്ധ’മായാല്‍ 21 നൂറ്റാണ്ടിലും അയിത്തത്തിന്റെ പേരില്‍ അവന്‍ കുളിക്കേണ്ടി വരും !!   (ഫലത്തില്‍ ചിത്രകാരന്‍ ചുവര്‍ ചിത്രം കാണേണ്ടെന്ന് തീരുമാനിച്ച് മടങ്ങി.)  ഇത്തരം വിഢി ആശയങ്ങളും ആചാരങ്ങളും ഇന്നും ക്ഷേത്രങ്ങളില്‍ നില നില്‍ക്കുന്നത് തന്ത്ര-മന്ത്രവാദികളുടെ ഹിഡണ്‍ അജണ്ടയുടെ ഭാഗമായാണെന്നു വേണം മനസ്സിലാക്കാന്‍. ആ ഹിഡണ്‍ അജണ്ടകള്‍ മനസ്സിലാക്കാനും, ക്ഷേത്രങ്ങള്‍ക്കകത്ത് ഇപ്പോഴും നിലനില്‍ക്കുന്ന വിവേചനങ്ങളുടേയും, അപമാനങ്ങളുടേയും അനീതിക്കെതിരെ ശബ്ദിക്കാനും പുരോഗമന പ്രസ്ഥാനങ്ങള്‍ വ്യക്തമായ മാനവിക ചരിത്ര കാഴ്ച്ചപ്പാടോടെ മുന്നോട്ടു വരേണ്ടതുണ്ട്. മനുഷ്യത്വ വിരുദ്ധമായ ബ്രാഹ്മണ മന്ത്രവാദികളുടെ ആചാരങ്ങള്‍ ജനങ്ങള്‍ മുന്നിട്ടിറങ്ങി നിരോധിക്കേണ്ടത് ജനാധിപത്യത്തിന്റെ വളര്‍ച്ചക്ക് അനിവാര്യമാണ്. 2008 ല്‍ കാവാലം നാരായണ പണിക്കര്‍ തളിപ്പറമ്പിലെ രാജരാജേശ്വര ക്ഷേത്രത്തിലെ ഒരു ബ്രാഹ്മണ മന്ത്രവാദിയില്‍ നിന്നും വീരശൃഖലയും നാട്യാചാര പുരസ്ക്കാരവും പിച്ച വാങ്ങുന്നതുപോലെ സ്വീകരിക്കുന്നതിലെ ലജ്ജാകരമായ അധമത്വത്തെക്കുറിച്ച് ചിത്രകാരന്‍ ഒരു പോസ്റ്റെഴുതിയിരുന്നു. അത് താഴെ ക്ലിക്കി വായിക്കാം.

കാവാലം നാരായണ പണിക്കര്‍ എന്ന പ്രസിദ്ധ നാടകാചാര്യന്  “നാട്യാചാര്യ” ബഹുമതി നല്‍കുന്നതിന്റെ 10.5.2008 ലെ മാതൃഭൂമിയിലെ വാര്‍ത്തയും ചിത്രവും !!

Wednesday, May 29, 2013

കമലിന്റെ സെല്ലുലോയിഡ്



മലയാളിക്ക് തന്റെ പൂര്‍വ്വകാലത്തെക്കുറിച്ച് തിരിച്ചറിവുണ്ടാകുക എന്നത് വളരെ അപൂര്‍വ്വമായി മാത്രം സംഭവിക്കുന്ന ഒന്നാണ്. അത്തരമൊരു അത്യപൂര്‍വ്വ സംഭവമാണ് കമലിന്റെ സെല്ലുലോയിഡ് എന്ന സിനിമ. സത്യത്തെ മുഖത്തോടു മുഖം നോക്കാന്‍ തയ്യാറല്ലാത്ത മലയാളി, മണ്മറഞ്ഞ സത്യത്തെ ചരിത്രത്തില്‍ നിന്നും ചികഞ്ഞെടുത്ത് സ്നേഹാദരങ്ങളോടെ നമിക്കുന്ന തിരിച്ചറിവിന്റേയോ ബോധോദയത്തിന്റേയോ ഒരു സിനിമയാണ് സെല്ലുലോയിഡ്.  മലയാള നാട്ടില്‍ ആദ്യമായി ഒരു സിനിമ നിര്‍മ്മിക്കുകയും, സംവിധാനം ചെയ്യുകയും, അഭിനയിക്കുകയും ചെയ്ത മനുഷ്യരെയും അവരുടെ സിനിമയേയും നമ്മുടെ പ്രാകൃതരും ജാതി ഭ്രാന്തരുമായിരുന്ന സമൂഹം എങ്ങനെയാണു നശിപ്പിച്ചതെന്നതിന്റെ ചരിത്ര സാക്ഷ്യമാണ് സെല്ലുലോയിഡിലൂടെ സത്യസന്ധമായി രേഖപ്പെടുത്തിയിരിക്കുന്നത്.  സമ്പന്നനായിരുന്ന ഡോ.ജെ.സി.ഡാനിയല്‍ എന്ന നാടാര്‍ കൃസ്ത്യാനിക്ക് ഒരു സിനിമ നിര്‍മ്മിക്കുന്നതിലൂടെ നിര്‍ദ്ധനനാകാനുള്ള യോഗമുണ്ടായി എന്ന ലളിത ചരിത്രമല്ല, സമൂഹത്തിന്റെ ഇടുങ്ങിയ മനസ്സിന്റേയും ജാതീയ അധമബോധത്തിന്റേയും തേര്‍വാഴ്ച്ച എങ്ങിനെയാണ് മലയാള സിനിമയുടെ പിതാവായ ജെ.സി.ഡാനിയലിനെയും, അദ്ദേഹത്തിന്റേ സിനിമയായ “വിഗത കുമാരനേയും” അതിലെ നായികയേയും നമ്മുടെ ചരിത്രത്തില്‍ നിന്നും മായ്ച്ചുകളഞ്ഞത് എന്നാണ് സെല്ലുലോയിഡ് സത്യസന്ധമായി രേഖപ്പെടുത്തിയിരിക്കുന്നത്. അതുകൊണ്ടുതന്നെ, ഈ സിനിമ മഹത്തരമാണ്. ഈ ചലച്ചിത്രത്തിനു ലഭിച്ച ദേശീയവും സംസ്ഥാന തലത്തിലുമുള്ള അവാര്‍ഡുകള്‍ സാര്‍ത്ഥകമാണ്.

ചിത്രകാരന്‍ സിനിമകണുന്നതൊക്കെ വളരെ കുറവാണ്. അഥവ കണ്ടാല്‍ തന്നെ ടി.വിയില്‍ നിന്നോ, പണം മുടക്കാതെ ലഭിക്കുന്ന സിഡി-ഡിവീഡികളില്‍ നിന്നോ ആയിരിക്കും. സമൂഹത്തോട് ഒരു ബന്ധവുമില്ലാത്ത ചവറു സിനിമകള്‍ക്കു മുന്നില്‍ മിഴിച്ചിരിക്കാനുള്ള ക്ഷമയില്ലാത്തതിനാലും, അത്തരം സിനിമകളുടെ സിഡിക്കും ഡീവിഡിക്കും പണം മുടക്കാന്‍ മനസ്സില്ലാത്തതുകൊണ്ടും സിനിമ അലര്‍ജ്ജി കലശലാണ്. എന്നാല്‍, സെല്ലുലോയിഡ് കാശുകൊടുത്ത് വാങ്ങി തന്നെ കണ്ടു. മാത്രമല്ല, സെല്ലുലോയിഡ് പോലുള്ള ഒരു സിനിമയുടെ സി.ഡിയോ, ഡിവിഡിയോ ഒരു ചരിത്ര രേഖയായി സൂക്ഷിക്കാന്‍ തക്ക മൂല്യമുള്ളതുമാണ്. സെല്ലുലോയിഡിന്റെ നിര്‍മ്മതാക്കള്‍ക്കും സംവിധായകന്‍ കമലിനും മറ്റു അണിയറ പ്രവര്‍ത്തകര്‍ക്കും ചിത്രകാരന്റെ നന്ദിയും അഭിവാദ്യങ്ങളും അര്‍പ്പിക്കുന്നു.


Friday, May 3, 2013

മെയ് 4, ചന്ദ്രശേഖരന്‍ വധത്തിന് ഒരു വര്‍ഷം

ചന്ദ്രശേഖരന്‍ 51 വെട്ടുകളേറ്റ് ക്രൂരമായി കൊല്ലപ്പെട്ടതിന്റെ ഒന്നാം വാര്‍ഷികമാണ് മെയ് നാല്. ദാരുണമായ ആ കൊലപാതകം കേരള രാഷ്ട്രീയത്തിലും സാംസ്ക്കാരികതയിലും ഏല്‍പ്പിച്ച മുറിവ് വളരെ ആഴത്തിലുള്ളതായിരുന്നു. രാഷ്ട്രീയ കൊലപാതകങ്ങളുടെ സ്കോര്‍ ബോര്‍ഡിലെ അക്കങ്ങളായി മാത്രം ജനങ്ങള്‍ ഉദാസീനമായി നോക്കിക്കണ്ടിരുന്ന രാഷ്ട്രീയ കൊലപാതക പരമ്പരകള്‍ക്ക് വ്യത്യസ്തമായി, ഒരു നല്ല മനുഷ്യനെ രാഷ്ട്രീയ ഗുണ്ടകള്‍ നീചമായി പച്ചക്ക് വെട്ടി കൊലപ്പെടുത്തിയതിന്റെ ഞെട്ടുന്ന യാഥാര്‍ത്ഥ്യബോധത്തിലേക്ക് ജനങ്ങള്‍ സടകുടഞ്ഞെണീക്കുന്ന അസാധാരണമായ ഒരു മാറ്റം ഈ കൊലപാതകത്തിന്റെ ഫലമായുണ്ടായി. കൊലപാതക രാഷ്ട്രീയത്തിന്റെ ന്യായവാദങ്ങളോട് സമൂഹമനസാക്ഷി പുലര്‍ത്തിയിരുന്ന മൌനാനുവാദം അഥവ നിസംഗത അവസാനിപ്പിക്കുന്ന ധീര രക്തസാക്ഷിത്വമായി  ചന്ദ്രസേഖരന്റെ കൊലപാതകംപരിണമിച്ചു. നവ- വിഷ്വല്‍ മീഡിയയുടെ ശക്തമായ വളര്‍ച്ചയുടേയും സ്വാധീനത്തിന്റേയും ഫലമായുണ്ടായ ഈ സാംസ്ക്കാരിക ഉണര്‍വ്വിനെ നമ്മുടെ രാഷ്ട്രീയ ബോധത്തെ നവീകരിക്കാനുള്ള നിമിത്തമായെടുക്കാന്‍ നമുക്ക് കഴിയേണ്ടതാണ്. ചന്ദ്രശേഖരന്‍ ചിന്തിയ രക്തത്തിന്റെയും അനുഷ്ഠിച്ച ത്യാഗത്തിന്റേയും ഫലമായെങ്കിലും ഇനിയൊരു രഷ്ട്രീയ കൊലപാതകത്തിനുള്ള സാംസ്ക്കാരിക ഇടം ഇല്ലാത്തവിധം സാമൂഹ്യ മനസാക്ഷി ശക്തമാകട്ടെ. അക്രമ-രാഷ്ട്രീയ കൊലപാതക വിരുദ്ധ ദിനമായി മെയ് 4 ആചരിക്കപ്പെടാന്‍ ഇടവരട്ടെ.

“ശംബൂക വധം 2012” എന്ന ചിത്രകാരന്റെ ചിത്രം
ചിത്രകാരന്‍ 2012 ആഗസ്റ്റ് മാസത്തില്‍ വരച്ച “ശംബൂക വധം 2012” എന്ന പെയിന്റിങ്ങ് ടി.പി.ചന്ദ്രശേഖരന്‍ വധത്തിന്റെ പശ്ചാത്തലത്തില്‍ നമ്മുടെ സമൂഹത്തിലെ അക്രമവാസനയുടെ സാംസ്ക്കാരിക കാരണങ്ങളെക്കുറിച്ചുള്ള അന്വേഷണമാണ്. ആരും തന്നെ കുറ്റവാളികളായി ജനിക്കുന്നില്ലെന്നും, സമൂഹത്തിലെ അംഗീകൃത സാംസ്ക്കാരികതയുടെ പ്രേരണയാലാണ് രാഷ്ട്രീയ കക്ഷികളിലായാലും, സമൂഹത്തിലെ മറ്റു വിഭാഗങ്ങളിലായാലും ഹിംസാത്മക ചിന്ത വളര്‍ന്നു വികസിക്കുന്നതെന്നും നിരീക്ഷിക്കുകയാണ് ഈ ചിത്രം. “അംഗീകൃത സംസ്ക്കാരികത” എന്നുള്ള പ്രയോകം ബോധപൂര്‍വ്വമാണ്. കാരണം, കുറ്റകൃത്യങ്ങളെ സാംസ്ക്കാരികമായി അംഗ്ഗീകരിക്കുന്നതിന്റെ ഫലമായാണ് കുറ്റകൃത്യങ്ങള്‍ ഒരു യാദൃശ്ചികതയാകാതെ വീണ്ടും വീണ്ടും ആവര്‍ത്തിക്കുന്ന ശീലങ്ങളായി മാറുന്നത്. കൊല്ലാനുള്ള ഗ്രൂപ്പുകള്‍ തന്നെ രാഷ്ട്രീയ പാര്‍ട്ടികളുടെയും, ബിസിനസ്സ് ഗ്രൂപ്പുകളുടേയും അവിഭാജ്യ ഘടകമായി മാറുന്നതും “അംഗീകൃത സംസ്ക്കാരികത” യുടെ പിന്‍ ബലത്തിലാണ്. 

“അംഗീകൃത സംസ്ക്കാരികത” 
 ഇന്ത്യയില്‍ ജാതി-മത വിശ്വാസങ്ങളുടെ വേര്‍ത്തിരിവില്ലാതെത്തന്നെ, അനൌപചാരികമായി നാമെല്ലാവരും ഹൈന്ദവ സാംസ്ക്കാരികതയുടെ രാമരാജ്യ സംങ്കല്‍പ്പത്തെ ഉന്നത മൂല്യബോധമായി കരുതിപ്പോരുന്നുണ്ട്. എല്ലാ വര്‍ഷത്തിലും ‘രാമായണ മാസാചരണമായി’ കേരളത്തിലെ മീഡിയകളുടെ നേതൃത്വത്തില്‍ ആ സാംസ്ക്കാരികതയെ നിര്‍ലജ്ജം മഹത്വവല്‍ക്കരിക്കുന്നതുപോലും നമുക്ക് കാണാനാകും. ന്യൂനപക്ഷ മതങ്ങളായ മുസ്ലീം, കൃസ്ത്യന്‍ ജന വിഭാഗങ്ങള്‍ പോലും സാമൂഹ്യ സഹകരണത്തിന്റേയും സഹിഷ്ണുതയുടേയും വിശാലതയായി ഭരണവര്‍ഗ്ഗ അനുഗ്രഹാശിസുകളുടെ തണലുള്ള ഹൈന്ദവ സാംസ്ക്കാരികതയെ പൊതു വിനിമയത്തിന്റെ ഏറ്റവും പ്രധാന ഇടമായി കാണുന്നുണ്ട്. പുരോഗമന മേക്കപ്പിട്ടു നില്‍ക്കുന്ന സംഘടനകളും “അംഗീകൃത സംസ്ക്കാരികത” എന്ന ഹൈന്ദവ സാംസ്ക്കാരികതയെ വിശുദ്ധ പശുവായി ആധരിക്കാന്‍ സാമൂഹ്യ ശീലങ്ങളാല്‍ നിര്‍ബന്ധിതരാണ്. 
ഈ സാഹചര്യത്തിലാണ് ഹൈന്ദവ സാംസ്ക്കാരികതയുടെ ഭാഗമായുള്ള ശ്രീരാമന്‍, പരശു രാമന്‍ തുടങ്ങിയ നന്മയുടേയും ധാര്‍മ്മികതയുടേയും മാതൃകാപുരുഷ പരിവേഷമുള്ള ദൈവ തുല്യരോ ദൈവങ്ങള്‍ തന്നെയോ ആയ ഇതിഹാസ പുരുഷന്മാരിലൂടെ മഹത്വവല്‍ക്കരിക്കപ്പെട്ടിരിക്കുന്ന അനീതിയുടേയും, അധര്‍മ്മത്തിന്റേയും, ചതിയുടേയും ഹിംസാത്മക പാരമ്പര്യം മാടമ്പിത്വത്തിന്റെ തുരുമ്പെടുത്ത ആയുധങ്ങളുമായി വര്‍ത്തമാന കാലത്തെ അധികാരകേന്ദ്രങ്ങളുടെ കോട്ടകൊത്തളങ്ങള്‍ക്ക് ബലം നല്‍കാനായി ഗുണ്ടാ സംഘങ്ങളായും കൊട്ടേഷന്‍ സംഘങ്ങളായും പ്രത്യക്ഷപ്പെടുന്നത്.  ജയ് ഹനുമാന്‍ വിളിച്ചും, കാളി, ശിവന്‍, ശ്രീരാമന്‍ , പരശുരാമന്‍ , നരസിംഹം , വിഷ്ണു തുടങ്ങിയ ഇതിഹാസ ശക്തികളെ ആവാഹിച്ചും ഹിംസയുടെ ശാക്തീകരണം നടത്തുന്നവര്‍ തങ്ങള്‍ ചെയ്യാനുദ്ധേശിക്കുന്ന ക്രൂരമായ കൊലപാതകത്തെപ്പോലും നന്മയുടെ സംസ്ഥാപനത്തിനായുള്ള ഒരു “മോക്ഷ” പ്രവര്‍ത്തിയിലേര്‍പ്പെടുന്ന മാനസികാവസ്ഥയാണ് ആര്‍ജ്ജിക്കുന്നത്. 

ശംബൂക വധം അഥവ “ശംബൂക മോക്ഷം” 
 ശ്രീരാമന്റെ രാജ്യത്തിലെ ഒരു ബ്രാഹ്മണന്റെ പുത്രന്‍ അകാലത്തില്‍ വെറുതെ മരിക്കാന്‍ കാരണമായ സംഭവമാണ് രാജാവിന്റെ ധര്‍മ്മഭ്രംശമായി വ്യാഖ്യാനിച്ച് ശംബൂക വധത്തിലൂടെ പരിഹരിക്കുന്നത്.  ശൂദ്രര്‍ക്ക് വിദ്യ നിഷിദ്ധമായിരുന്നിട്ടും ആ സാമൂഹ്യ നിയമം ധിക്കരിച്ച് തപസ്സ് അനുഷ്ടിച്ചു എന്നതാണ് ശൂദ്രനായ ശംബൂകന്റെ പേരിലുള്ള ഘോരാപരാധം ! പുത്രശോകത്താല്‍ വിലപിക്കുന്ന ബ്രാഹ്മണന്റെ ആരോപണത്തിനു വക്കാലത്തുമായി ദേവര്‍ഷി നാരദമുനി സ്വര്‍ഗ്ഗത്തില്‍ നിന്നും ഇറങ്ങിവന്ന് ശൂദ്രന്‍ തപസനുഷ്ടിക്കുന്നതു കാരണമായുണ്ടായ ധാര്‍മ്മിക തകര്‍ച്ച കാരണമാണ് ബ്രാഹ്മണകുമാരന്‍ മരിക്കാനിടവന്നതെന്ന് അഭിപ്രായപ്പെട്ടയുടന്‍ ശൂദ്ര നിഗ്രഹത്തിനുള്ള കൊട്ടെഷനെടുത്ത് പുഷ്പ്പക വിമാനത്തിലേറി നാടു മുഴുവന്‍ അരിച്ചുപെറുക്കി, തപസനുഷ്ടിക്കുന്ന ശൂദ്രനെ കണ്ടെത്തി, കണ്ണില്‍ ചോരയില്ലാതെ ശംബൂകന്‍ എന്ന ശൂദ്രന്റെ കഴുത്തറക്കുന്ന അത്യന്തം നീചമായ പ്രവര്‍ത്തിയെ ദൈവീകവല്‍ക്കിരിച്ചിരിക്കുന്ന ഹൈന്ദവ സാംസ്കാരികതയുടെ മൂല്യബോധം മാതൃകാപുരുഷോത്തമന്റെ ക്രൂരത നമ്മെ വര്‍ത്തമാനത്തിലും പിന്‍ തുടരുന്നുണ്ട്. ശ്രീരാമന്‍ നടത്തിയ നരഹത്യയായതിനാല്‍ ശംബൂക വധം എന്നതിനു പകരം “ശംബൂക മോക്ഷം” എന്ന അനുഗ്രഹ പ്രവര്‍ത്തിയായി കൊലപാതകത്തെ വേഷം മാറ്റി വ്യാഖ്യാനിച്ച് മഹത്വവല്‍ക്കരിക്കാനും സാമര്‍ത്ഥ്യമുള്ളതിനാല്‍ ഏത് കുടിലതക്കും ഹൈന്ദവ സാംസ്ക്കാരികതക്ക് ന്യായീകരണമുണ്ടാക്കാനാകുമെന്നും തെളിയിച്ചിരിക്കുന്നു !!  

ദൈവങ്ങളിലൊന്നും വിശ്വാസമില്ലാത്ത “പുരോഗമന” പ്രസ്ഥാനങ്ങളില്‍ രക്തസാക്ഷികളുടെ പേരോ, പ്രതികാരത്തിന്റെ കണക്കു പുസ്തകമോ, മാര്‍ഗ്ഗത്തെ സാധൂകരിക്കുന്ന “മഹത്തായ ലക്ഷ്യങ്ങളോ”  രാമനും, കൃഷ്ണനും, പരശുരാമനും പകരമായുപയോഗിക്കുന്ന വേഷപ്പകര്‍ച്ചയായി കൊലക്കത്തീയെ ന്യായീകരിക്കുന്നുണ്ട്. ഹൈന്ദവ സാംസ്ക്കാരികതയുമായുള്ള സാംസ്ക്കാരിക പങ്കുവക്കല്‍ ശീലത്തിന്റെ ഭാഗമായുള്ളതുതന്നെയാണ് ഈ പ്രസ്ഥാനങ്ങളുടേയും ധാര്‍മ്മികത.  ഹിംസയിലൂടെ നേടുന്ന ഒരു ലക്ഷ്യവും ദൈവീകമോ ധാര്‍മ്മികമോ നീതീകരിക്കത്തക്കതോ അല്ലെന്ന സാംസ്ക്കാരിക പ്രബുദ്ധത ബോധത്തിന്റെ നവീകരണത്തിലൂടെ സ്വായത്തമാക്കാന്‍ നമുക്ക് കഴിയട്ടെ. നമ്മുടെ സാംസ്ക്കാരികതയെ പരമാവധി ധാര്‍മ്മികമായും, മാനവികമായും, നീതിപൂര്‍വ്വകമായും പുതുക്കിപണിയാന്‍ അധാര്‍മ്മികമായ ബിംബങ്ങളെ നിരന്തരം വിമര്‍ശിക്കുകയല്ലാതെ മറ്റു വഴിയില്ല. ചിത്രകാരന്റെ “ശംബൂക വധം 2012” അതിലേക്കുള്ള ഒരു എളിയ ചിന്തയാണ്.  
ഈ വിഷയത്തിലുള്ള ചില പോസ്റ്റുകളുടെ ലിങ്കുകള്‍ :
രാമായണമാസത്തിലെ ചിത്രം ! 
പരശുരാമന്‍-ക്രൂരതയുടെ അവതാരം ! 

Wednesday, May 1, 2013

മെയ് ദിന ചിത്രം , “താജ് മഹല്‍ ”


ഇന്ന് മെയ് ദിനം! ലോക തൊഴിലാളി ദിനത്തില്‍ എത്ര പേര്‍ തൊഴിലിനെക്കുറിച്ചും, തൊഴിലിന്റെ പേരില്‍ മനുഷ്യന്‍ അനുഭവിച അടിമത്വത്തിന്റെ ചരിത്രത്തെക്കുറിച്ചും ഓര്‍ക്കുന്നുണ്ടാകും ? ഇത്രയും കാലം നാം ആഘോഷിച്ച ലോക തൊഴിലാളി ദിനങ്ങളുടെ പേരില്‍ തൊഴിലിന്റെ മഹത്വം നമ്മുടെ സമൂഹത്തിനു ബോധപ്പെടുകയുണ്ടായോ ? ഇല്ലെന്നാണ് ചിത്രകാരന്റെ ബോധം. തൊഴിലിന്റെ മഹത്വം തിരിച്ചറിയാതെ ആഘോഷിക്കപ്പെടുന്ന മെയ് ദിനങ്ങള്‍ അടിമത്വത്തിന്റെ ആഘോഷമായല്ലേ മനസ്സിലാക്കേണ്ടത് ? തങ്ങളുടെ അടിമത്വം ആഘോഷിക്കുന്ന സമൂഹത്തെക്കുറിച്ച് ലജ്ജ നമുക്ക് ലജ്ജ തോന്നാത്തത് എന്തുകൊണ്ടാണെന്നെങ്കിലും നാം കണ്ടുപിടിക്കേണ്ടതല്ലേ ? നാം പശ്ചാത്യ നാടുകളില്‍ നിന്നും വിപ്ലവം ഇറക്കുമതി ചെയ്ത് ... ഗോതമ്പും പാല്‍പ്പൊടിയും പോലെ വിതരണം ചെയ്യുന്നത് വാങ്ങാന്‍ ക്യൂവില്‍ നില്‍ക്കുന്നവരാണല്ലോ. നമ്മുടെ നാട്ടില്‍ തന്നെയുള്ള അദ്ധ്വാനത്തിന്റെ മഹാത്ഭുതങ്ങളെ തിരിച്ചറിയാനും ആ അദ്ധ്വാനത്തിന്റെ പിന്നിലെ വിയര്‍പ്പു തുള്ളികളെ എണ്ണി തിട്ടപ്പെടുത്താനും, ആ വിയര്‍പ്പു തുള്ളികള്‍ക്കു ലഭിച്ച ക്രൂരതയുടേയും ചതിയുടേയും പ്രതിഫലത്തിന്റെ കണക്കു പുസ്തകം തയ്യാറാക്കാന്‍ മുതിരാതെ, കള്ള കഥകള്‍ക്കും, കവിതകള്‍ക്കും, കള്ള ചരിത്രങ്ങള്‍ക്കും കാതോര്‍ത്ത് കാത്തിരിക്കുന്നത് നമ്മുടെ ജീര്‍ണ്ണ സാംസ്ക്കാരികത കാരണമാകാം. ലോക തൊഴിലാളി ദിനം പ്രമാണിച്ച് ചിത്രകാരന്‍ 2013 ഏപ്രില്‍ മാസം വരച്ച “താജ് മഹല്‍” എന്ന ചിത്രത്തിന്റെ ഒരു ഡീറ്റൈല്‍ ഫോട്ടോ നെറ്റ് സുഹൃത്തുക്കള്‍ക്കായി പബ്ലിഷ് ചെയ്യുന്നു. പൂര്‍ണ്ണമായ ചിത്രം രണ്ടോ മൂന്നോ ദിവസത്തിനകം അപ്ലോഡ് ചെയ്യുന്നതായിരിക്കും. ഈ ചിത്രത്തിന്റെ ഇന്നത്തെ പ്രസക്തി : 20000 മനുഷ്യര്‍ 22 വര്‍ഷം കഠിനാദ്ധ്വാനം ചെയ്ത് നിര്‍മ്മിക്കപ്പെട്ട ഇന്ത്യയുടെ ലോകാത്ഭുതമായി നിലകൊള്ളുന്ന താജ് മഹല്‍ നാം തൊഴിലാളിയുടെയോ അദ്ധ്വാനത്തിന്റേയോ മഹത്വമായി ഇനിയും നോക്കിക്കാണാന്‍ തുടങ്ങിയിട്ടില്ല എന്നതാണ്. ഉസ്താദ് അഹമ്മദ് ലഹോരിയുടെ രണ്ടു കൈകളായാലും, വലതു കൈ മാത്രമായാലും ചേദിച്ചുകളഞ്ഞ ഷാജഹാന്റെയും മൂന്നാമത്തെ ഭാര്യയായ മുംതാസ് മഹലിന്റെയും തീവ്രമായ പ്രേമത്തിന്റെ പൊള്ളയായ കഥകള്‍ അയവിറക്കിയിരിക്കുന്ന നമുക്ക് അദ്ധ്വാനത്തിന്റെ മഹത്വത്തെ എങ്ങനെയാണ് ഉള്‍ക്കൊള്ളാനാകുക ? താജ് മഹലിന്റെ മുഖ്യ ശില്‍പ്പിയായി 22 വര്‍ഷം സേവനമനുഷ്ടിച്ചതിന്റെ “പ്രതിഫലമായി“  ലഹോരിയുടെ തലതന്നെ വെട്ടിയെടുക്കാന്‍ ചക്രവര്‍ത്തി തിരുമനസ്സിന് കഴിയുമായിരുന്നിട്ടും കൈകള്‍ മാത്രം വെട്ടിയെടുത്ത് ആ കമ്മാളനെ ജീവനോടെ വിട്ടു എന്നത് ചക്രവര്‍ത്തി തിരുമനസ്സിന്റെ സ്നേഹ വാത്സല്യമായിപ്പോലും നമ്മുടെ പാണന്മാര്‍ കവിതയെഴുതും !!! ലഹോരിക്ക് കൈ മാത്രമേ പോയുള്ളു. മറ്റ് 20000 ശില്‍പ്പികള്‍ക്കും കാലിഗ്രാഫിസ്റ്റുകള്‍ക്കും ചിലപ്പോള്‍ തലതന്നെ നഷ്ടപ്പെട്ടിരിക്കാം. അധികാരത്തിന്റേയും, അജ്ഞതയുടേയും, സ്വാര്‍ത്ഥതയുടേയും, ക്രൂരതയുടേയും മൂര്‍ത്തീകരണമായ ഷാജഹാന്റെ മരണാനന്തര പ്രശസ്തിക്കായിമാത്രം നീക്കിവക്കേണ്ടതാണോ താജ്മഹല്‍ ? താജ് മഹല്‍ 20000 ശില്‍പ്പികളുടെ വിയര്‍പ്പില്‍ നിന്നും ജന്മംകൊണ്ട മഹാത്ഭുതമാണെന്നും, ആ മഹാത്ഭുതത്തെ തന്റെ വ്യക്തിഗതമായ സ്വാര്‍ത്ഥതയുടെ മഹത്വവല്‍ക്കരണത്തിനായി ചതിയിലൂടെ കവര്‍ന്നെടുത്ത ദുഷ്ടനായ തിന്മയായിരുന്നു ഷാജഹാനെന്നും നാം യാഥാര്‍ത്ഥ്യബോധത്തോടെ കാണേണ്ടതല്ലേ ? അതിന്റെ ഭാഗമായി താജ് മഹലിന്റെ ഭംഗിക്കു കോട്ടം തട്ടാതെ, ഉസ്താദ് അഹമ്മദ് ലഹൌരിയുടെ ആകാശം മുട്ടുന്ന ഒരു പ്രതിമ യമുനാ നദിയുടെ മറു കരയില്‍ താജ് മഹലിനെ അഭിമുഖീകരിച്ചു നില്‍ക്കുന്നതയി നമുക്ക് നിര്‍മ്മിക്കാന്‍ തോന്നേണ്ടതല്ലേ ? ഓസ്കാര്‍ ശില്‍പ്പം പോലുള്ള മാനവികമായ ഒരു രൂപം !!! അദ്ധ്വാനത്തിന്റേയും, ആവിഷ്ക്കാര സ്വാതന്ത്ര്യത്തിന്റേയും , മാനവികതയുടെയും മഹത്വം ഉദ്ഘോഷിച്ചുകൊണ്ട് ഇന്ത്യയുടെ സ്വാതന്ത്ര്യ പ്രതിമയായി ഉസ്താദ് അഹമ്മദ് ലഹൌരി നമ്മുടെ അടിമത്വത്തെ അതിജീവിക്കാനായി ഉയിര്‍ത്തെണീക്കട്ടെ എന്ന് ഈ ലോക തൊഴിലാളി ദിനത്തില്‍ ചിത്രകാരന്‍ സ്വപ്നം കാണട്ടെ !
Face book post link.
Google plus post link.

Wednesday, January 30, 2013

നങ്ങേലി-മുലക്കരത്തിന്റെ രക്തസാക്ഷി


ഈ ജനുവരി 30നും പതിവുപോലെ നാം നമ്മുടെ രാഷ്ട്ര പിതാവായ മഹാത്മാഗാന്ധിയെ വെടിവച്ചുകൊന്നതിന്റെ പാപക്കറ പൂക്കളിലൊളിപ്പിച്ച്,രക്തസാക്ഷിത്വത്തിന്റെ 65 ആം വാര്‍ഷികം ആചരിക്കുന്നു. നമ്മുടെ കൈകളിലെ രക്തക്കറയൊഴിച്ച് മറ്റേത് വിഷയത്തെക്കുറിച്ചും നാം ചര്‍ച്ചചെയ്യും. പക്ഷേ, ആ ചോരക്കറയെക്കുറിച്ച് പഠിക്കാനും പശ്ചാത്തപിക്കാനും നാം എന്നാണു പ്രാപ്തി നേടുക !! മുന്നോട്ടു പോകണമെങ്കില്‍ ആ ചോരക്കറയുടെ ഉത്തരവാദിത്വം വെറുമൊരു ഗോഡ്സെയില്‍ മാത്രം ചുമത്താതെ നമ്മുടെ സാംസ്ക്കാരിക പങ്കുകൂടി വീതിച്ചെടുക്കാതെ വയ്യ. ഹിന്ദുത്വം എന്ന് നാം ദുരഭിമാനിക്കുന്ന 1500 വര്‍ഷം പഴക്കമുള്ള സാംസ്ക്കാരിക ജീര്‍ണ്ണതയുടെ രക്തസാക്ഷിയായാണ് മഹാത്മാഗന്ധിയും കൊല്ലപ്പെട്ടതെന്ന് ചിത്രകാരന്‍ വിശ്വസിക്കുന്നു. പാല്‍പ്പായസം പോലുള്ള അംഗീകൃത ചരിത്രങ്ങളുടെ മൌനം കട്ടപിടിച്ച ഇടനാഴികളില്‍ കെട്ടിക്കിടക്കുന്ന കൊല്ലപ്പെട്ട ചരിത്രങ്ങളുടെ രക്തകുളങ്ങളെ രേഖപ്പെടുത്തേണ്ടത് മാനവികതയുടെ സത്യസന്ധതയുടെ ഭാഗമാണെന്നെങ്കിലും നാം മനസ്സിലാക്കേണ്ടിയിരിക്കുന്നു.  സത്യാന്വേഷകനും സത്യാഗ്രഹിയുമായിരുന്ന മഹാത്മാഗാന്ധിയുടെ 65 ആം രക്തസാക്ഷി ദിനത്തില്‍ അത്രത്തോളം തന്നെ മഹത്തരമായ ത്യാഗത്തിലൂടെ കേരളത്തിലെ തിരുവിതാംകൂര്‍ രാജ്യത്ത് സ്ത്രീകള്‍ക്ക് “മുലക്കരം” നല്‍കാതെ മാറുമറക്കാനുള്ള സ്വാതന്ത്ര്യം നേടിത്തന്ന “നങ്ങേലി”യുടെ ഒരു ചിത്രം വരച്ചു പൂര്‍ത്തിയാക്കിയതായി ജനങ്ങളെ അറിയിച്ചുകൊള്ളുന്നു. നമ്മുടെ പണ്ഡിത പ്രമാണികളായ ചരിത്രകാരന്മാര്‍ ചരിത്രത്തില്‍ ഉള്‍പ്പെടുത്താന്‍ മനപ്പൂര്‍വ്വം മറന്നു പോയ ചരിത്രമാണ് കേരള സ്ത്രീത്വത്തിന്റെ മഹനീയ മാതൃകയായ നങ്ങേലിക്കുള്ളത്. ആലപ്പുഴ ജില്ലയിലെ ചേര്‍ത്തല പട്ടണത്തില്‍ “മുലച്ചിപ്പറമ്പ്” എന്ന സ്ഥലം ഇപ്പോഴും അനാഥമായി സ്ഥിതിചെയ്യുന്നുണ്ട്. ചരിത്രമറിയുന്നവരും, നങ്ങേലിയുടെ ബന്ധുജനങ്ങളും ചേര്‍ത്തലയിലുണ്ട്. മുലക്കരം അടക്കാത്തതിന്റെ കാരണം അന്വേഷിച്ചുവന്ന  തിരുവിതാംകൂര്‍ രാജാവിന്റെ അധികാരി(വില്ലേജ് ഓഫീസര്‍ / പ്രവര്‍ത്തിയാര്‍ ) ക്ക് മുന്നില്‍ നിലവിളക്കു കത്തിച്ചുവച്ച്, നാക്കിലയിലേക്ക് ഭക്ത്യാദരപൂര്‍വ്വം മുലകള്‍ മുറിച്ചുവച്ച്  മുലക്കരത്തില്‍ നിന്നും മുക്തി നേടിയ നങ്ങേലി, മുലക്കരം നിറുത്തല്‍ ചെയ്യാനുള്ള നിമിത്തമാവുകയായിരുന്നു. മാറു മറക്കാനുള്ള അവകാശത്തിനായി 50 വര്‍ഷത്തിലേറെക്കാലം തിരുവനന്തപുരത്ത്  മേല്‍ വസ്ത്രം ധരിച്ചുകൊണ്ട് നിയമ ലംഘനങ്ങള്‍ നടത്തിപ്പോന്നതിന്റെ പേരില്‍ മൃഗീയമായി രാജ കിങ്കരന്മാരുടെ ആക്രമണത്തിനിരയായിരുന്ന കൃസ്തുമതക്കാരായ ചാന്നാര്‍ സ്ത്രീകള്‍ നടത്തിയ സമരത്തിന്റെ പരിസമാപ്തിയായി നങ്ങേലിയുടെ ധീരോജ്ജ്വലമായ ത്യാഗത്തെ ഒരു ചിത്രകാരനെന്ന നിലയില്‍ ഈ പെയിന്റിങ്ങിലൂടെ രേഖപ്പെടുത്തട്ടെ. ഇതോടൊപ്പം കൊടുത്തിരിക്കുന്ന പെയിന്റിങ്ങ് മുഴുവന്‍ ചിത്രത്തിന്റെ ഒരു ഭാഗം മാത്രമാണ്. പൂര്‍ണ്ണ ചിത്രം പിന്നീട്.  ഈ ചിത്രം കൂടാതെ മറ്റൊരു ചിത്രം കൂടി നങ്ങേലിയെക്കുറിച്ച് വരച്ചുകൊണ്ടിരിക്കുന്നുണ്ട്. ഫെബ്രുവരിയില്‍ ആ ചിത്രവും പൂര്‍ത്തിയാക്കി പോസ്റ്റു ചെയ്യുന്നതാണ്. മുത്തപ്പന്‍ ബ്ലൊഗില്‍ നങ്ങേലിയെക്കുറിച്ചു വന്ന പോസ്റ്റിന്റെ ലിങ്ക് താഴെ കൊടുക്കുന്നു.

ഭാര്യയുടെ ചിതയില്‍ ചാടി സതി അനുഷ്ടിച്ച കണ്ടപ്പന്‍


Saturday, January 12, 2013

വില്ലുവണ്ടി യാത്ര

അറിവില്ലായ്മയുടേയും അടിമത്വത്തിന്റേയും തടവറയില്‍ സര്‍വ്വാധിപതികളായ കോമാളികളായി അഭിനയിച്ചുകൊണ്ടിരുന്ന കേരളത്തിലെ ശൂദ്ര രാജാക്കന്മാര്‍ ജനങ്ങളെ ക്രൂരമായി അപമാനിച്ചും ഹീനമായ നികുതികളാല്‍ കൊള്ളയടിച്ചും തങ്ങളുടെ അപകര്‍ഷതക്ക് ആശ്വാസം കണ്ടെത്തിയിരുന്ന ഇരുണ്ട കാലത്താണ് കേരളത്തിന്റെ അഭിമാനമായ സാമൂഹ്യ പരിഷ്ക്കര്‍ത്താവായ അയ്യങ്കാളി ഉദിച്ചുയരുന്നത്. പൊതുവഴിയിലൂടെ സഞ്ചാര സ്വാതന്ത്ര്യമോ അക്ഷരം പഠിക്കാനുള്ള അവകാശാമോ മനുഷ്യരെന്ന് സ്വയം അഭിമാനിക്കാനുള്ള സാഹചര്യങ്ങളോ ഇല്ലാതിരുന്ന നരാധമ രാജഭരണത്തിന്‍ കീഴില്‍ അടിമത്വത്തിന്റെ ഏറ്റവും തിക്തഫലങ്ങള്‍ അനുഭവിച്ചിരുന്ന ജന വിഭാഗങ്ങള്‍ക്കിടയില്‍ നിന്നും ഉയര്‍ന്നുവന്ന അയ്യന്‍ കാളി തന്റെ സമൂഹത്തിനായി പടിപടിയായി മനുഷ്യാവകാശങ്ങള്‍ നേടിയെടുത്ത ചരിത്രത്തിന്റെ നാള്‍ വഴികളില്‍ പ്രധാനപ്പെട്ട വില്ലുവണ്ടി യാത്രയുടെ ശില്‍പ്പാവിഷ്ക്കാരമാണ് എറണാകുളം ചെറായിയിലെ അംബേദ്ക്കര്‍ ബീച്ചില്‍ കാണാനാകുക. പണത്തിനു പുറകേയുള്ള നെട്ടോട്ടത്തില്‍ സ്വന്തം അച്ഛനാരെന്ന സത്യം പോലും വിസ്മരിക്കുന്ന സാംസ്ക്കാരികത നിലനില്‍ക്കുന്ന സമൂഹത്തില്‍ ചരിത്രത്തെക്കുറിച്ച് ബോധം നല്‍കുന്ന ചൂണ്ടു പലകകള്‍ പോലെ ഈ ശില്‍പ്പങ്ങള്‍ പ്രാധാന്യമര്‍ഹിക്കുന്നു. അംബേദ്ക്കറുടേയും അയ്യന്‍ കാളിയുടെ വില്ലുവണ്ടി യാത്രയുടേയും ശില്‍പ്പങ്ങള്‍ ഒരുക്കിയിരിക്കുന്നത് ശില്‍പ്പിയും ആര്‍ച്ചിടെക്റ്റുമായ പി.ടി.രാജു ഏഴിക്കരയാണെന്ന് ഇവിടെ ആലേഖനം ചെയ്തു കാണുന്നു. 30.8 2012 ലാണ് ഈ ശില്‍പ്പങ്ങള്‍ ബീച്ചിന്റെ ഭാഗ്യമായി ഔപചാരികമായി സ്ഥാപിക്കപ്പെട്ടിരിക്കുന്നത്. ചേറായിയിലെ ഡോ.ബി.ആര്‍.അംബേദ്ക്കര്‍ സ്മാരക സമിതിയുടെ താല്‍പ്പര്യത്തില്‍ നിര്‍മ്മിച്ച് പരിപാലിക്കപ്പെടുന്ന ഈ ശില്‍പ്പങ്ങള്‍ സമൂഹത്തിനു ലക്ഷ്യബോധം നല്‍കട്ടെ. ചിത്രകാരന്‍ എടവനക്കാട്ടെ സുഹൃത്തായ സുദേഷുമൊന്നിച്ച് ഈ ശില്‍പ്പത്തെക്കുറിച്ച് കേട്ടറിഞ്ഞ് നട്ടുച്ച നേരത്ത് അംബേദ്ക്കര്‍ ബീച്ചിലൂടെ ഒരു ഓട്ട പ്രദിക്ഷണം നടത്തിയതിന്റെ ചിത്രങ്ങള്‍ താഴേ ചേര്‍ത്തിരിക്കുന്നു.







Monday, January 7, 2013

സര്‍ക്കാര്‍ ജീവനക്കാര്‍ പെരുച്ചാഴികളോ ?

ഇന്നത്തെ പത്രം വായിച്ചുവോ ? (7.1.2013) സര്‍ക്കാര്‍ ജീവനക്കാര്‍ പ്രഖ്യാപിച്ച സമരത്തിന്റെ അപ്രസക്തി തുറന്നുകാട്ടാനാണെങ്കിലും, പത്രത്തില്‍ കേരള ഗവണ്മെന്റിന്റെ ഒരു വര്‍ഷത്തെ വരവു ചിലവു കണക്കുകള്‍ സംക്ഷിപ്തമായി പരസ്യപ്പെടുത്തിയിട്ടുണ്ട്.  2011-2012 സാമ്പത്തിക വര്‍ഷത്തില്‍ സര്‍ക്കാര്‍ വരുമാനമായ 29197 കോടി രൂപയില്‍ 23537 കോടിയും ചിലവഴിച്ചത് സര്‍ക്കാര്‍ ജീവനക്കാര്‍ക്ക് ശമ്പളവും പെന്‍ഷനും കൊടുക്കാനാണെന്ന് കാണുന്നു !! അതായത് സര്‍ക്കാര്‍ വരുമാനത്തിന്റെ 81% വും ജനസംഖ്യയുടെ 3%ത്തിനു താഴെ മാത്രമായ സര്‍ക്കാര്‍ ജീവനക്കാര്‍ ഒറ്റക്കു തിന്നുതീര്‍ക്കുമ്പോള്‍ ബാക്കി വരുന്ന കേവലം 19% വരുമാനത്തില്‍ നിന്നും മന്ത്രി, എം.എല്‍ . എ., മറ്റു വെള്ളാനകള്‍ എന്നിവരുടെ എസ്കോര്‍ട്ട്, ഉദ്ഘാടനം, തറക്കല്ലിടല്‍ , പ്രസംഗിച്ചു നാടു തെണ്ടല്‍ , ടി.എ., ഡി.എ. സര്‍ക്കാരിന്റെ കടവും പലിശയുമടക്കല്‍  തുടങ്ങിയ ജീവല്‍ പ്രശ്നങ്ങളെല്ലാം കഴിഞ്ഞിട്ടു വേണം വല്ല പാലമോ, സ്കൂളൊ, റോഡോ, ആശുപത്രിയോ, കളിസ്ഥലമോ മൊത്തം ജനങ്ങള്‍ക്കായി നിര്‍മ്മിച്ചു നല്‍കാന്‍ .

രാഷ്ട്രീയക്കാരുടെ ചക്കരക്കുടത്തില്‍ കയ്യിട്ടുമാന്തല്‍ നമുക്ക് വേറെ ചര്‍ച്ചചെയ്യാം.  കേരളത്തിലെ മൂന്നേക്കാല്‍ കോടിയിലേറെവരുന്ന ജനങ്ങള്‍ നല്‍കുന്ന നികുതിപ്പണത്തിന്റെ സിംഹഭാഗവും തിന്നുതീര്‍ക്കുന്നത് ഉത്പ്പാദനക്ഷമമോ ക്രിയാത്മകമോ അല്ലാത്ത വെറും ന്യൂനപക്ഷമായ 3%ല്‍ താഴെവരുന്ന  സര്‍ക്കാര്‍ ജീവനക്കാരാണെന്ന സത്യം ഭയാനകമായ നമ്മുടെ സാമൂഹ്യ വിപത്തിലേക്കാണ് അല്ലെങ്കില്‍ സാമൂഹ്യ അസമത്വത്തിലേക്കാണ് വിരല്‍ ചൂണ്ടുന്നത്. എന്തായാലും സര്‍ക്കാര്‍ ജീവനക്കാര്‍ വിളവു തിന്നുന്ന വേലികളായി നമ്മുടെ സമൂഹത്തിന്റെ വരുമാനം മുഴുവന്‍ നിയമവിധേയമായി ഒറ്റക്കു തിന്നുതീക്കാന്‍ തുടങ്ങിയത് കഴിഞ്ഞവര്‍ഷം മുതലല്ല. എല്ലാ രാഷ്ട്രീയ പാര്‍ട്ടികള്‍ക്കും സര്‍ക്കാര്‍ ജീവനക്കാര്‍ നടത്തുന്ന -ഫലത്തില്‍ - ഖജനാവു കൊള്ളയടിക്കുന്ന ഈ വ്യവസ്ഥിതിയുണ്ടാക്കി നിലനിര്‍ത്തുന്നതില്‍ പങ്കുണ്ട്. സര്‍ക്കാര്‍ ജീവനക്കാരെ പ്രീണിപ്പിച്ച് നിര്‍ത്തുന്നതിലൂടെ മാത്രമേ അധികാരത്തിന്റെയും പൊതുമുതലിന്റേയും സുഗമമായ പങ്കുവെപ്പ്  സാധ്യമാകു എന്ന് ആര്‍ക്കാണറിയാത്തത് !

സര്‍ക്കാര്‍ പത്ര പരസ്യത്തിലെ പ്രസക്ത ഭാഗം

ഫലത്തില്‍ പെരുച്ചാഴികള്‍
സര്‍ക്കാര്‍ ജീവനക്കാര്‍ തൊഴിലാളികളല്ലേ, അവര്‍ക്ക് നല്ല ശംബളവും ആനുകൂല്യങ്ങളും നല്‍കേണ്ടത് ഏതൊരു സമൂഹത്തിന്റേയും സര്‍ക്കാരിന്റേയും ധാര്‍മ്മിക ബാധ്യതയും മാനുഷിക കാഴ്ച്ചപ്പാടിന്റെ ഭാഗവുമല്ലേ എന്ന് കൂലിപ്പണിയേടുക്കുന്ന കണാരേട്ടനും ഓട്ടോ റിക്ഷ ഓടിക്കുന്ന ജമാലിക്കയും ബീഡി തേറുക്കുന്ന പ്രസന്നേച്ചിയും വരെ നിരവധി ന്യയങ്ങള്‍ നിരത്തി ചോദിക്കും. കാരണം, “തൊഴിലാളി വര്‍ഗ്ഗത്തിന്റെ” അവകാശങ്ങള്‍ക്കു വേണ്ടി തൂപ്പുകാരി തൊട്ട് ഐ.എ.എസ്സുകാരന്‍ വരെ നമ്മുടെ നാട്ടില്‍ ഒറ്റക്കെട്ടാണ്. സര്‍ക്കാര്‍ റേഷന്‍ കടകളിലൂടെ നീണ്ട ക്യൂകളുടെ അറ്റത്തു വിതരണം ചെയ്യുന്ന ബിപീ‌‌എല്‍ പിച്ചയായ രണ്ടു രൂപയുടെ അരി വാങ്ങിയുണ്ണുന്നവര്‍പോലും സര്‍ക്കാര്‍ ജീവനക്കാര്‍ക്ക് ശംബളവര്‍ദ്ധനയുണ്ടാകട്ടെ എന്നേ ആഗ്രഹിക്കു. കാരണം, നമ്മുടെ മൈന്‍ഡ് സെറ്റ് അങ്ങിനെയാണ്. നമ്മള്‍ ഉണ്ടില്ലെങ്കിലും ബ്രാഹ്മണരെ ഊട്ടണമെന്ന് നിര്‍ബന്ധമുള്ള അസ്സല്‍ വിഢികളുടെ നാടാണ്. പണ്ട് തിരുവിതാംകൂര്‍ രാജാക്കന്മാര്‍ നൂറിലേരെ പേരുകളില്‍ ചുമത്തിയിരുന്ന ക്രൂരമായ കൊള്ള നികുതികള്‍ ജനങ്ങളില്‍ നിന്നും പിരിച്ചെടുത്തിരുന്നത് അന്നത്തെ സര്‍ക്കാര്‍ ജീവനക്കാരായ പട്ടന്മാരെ തീറ്റിപ്പോറ്റാനും, ആയിരക്കണക്കിനു വരുന്ന ബ്രാഹ്മണര്‍ക്ക് ദിവസവും അന്നദാനം നടത്താനും, മുറജപം, ഹിരണ്യഗര്‍ഭം, തുലാപുരുഷദാനം  തുടങ്ങിയ ചടങ്ങുകളില്‍ ആയിരക്കണക്കിനു ബ്രാഹ്മണരെ തൃപ്തിപ്പെടുത്താനുമായി  സ്വര്‍ണ്ണം ദാനം ചെയ്യുന്നതിനുമായിരുന്നല്ലോ. ഇന്ന് ബ്രാഹ്മണര്‍ക്കു പകരം സര്‍ക്കാര്‍ ഗുമസ്തന്മാരും രാഷ്ട്രീയ പാര്‍ട്ടികളും നമ്മുടെ നികുതിപ്പണത്തിന്റെ അംഗീകൃത അവകാശികളായിരിക്കുന്നു !!

ആക്രാന്തം ശമിക്കുന്നില്ല !
ശമ്പളവും, പെന്‍ഷനും , പിന്നെ പലിശയും കൂടി നല്‍കണമെങ്കില്‍ 2981 കോടി രൂപ ഒരോ വര്‍ഷം കൂടുതലായി ജനങ്ങളുടെ പിച്ചച്ചട്ടിയില്‍ നിന്നും അധിക നികുതിയിനത്തില്‍ കണ്ടെത്തിയാലെ ഗവണ്മെന്റിന് പെരുച്ചാഴികളോടുള്ള ധാര്‍മ്മിക ബാധ്യത തീര്‍ക്കാനാകു എന്നാണ് സര്‍ക്കാര്‍ പരസ്യത്തിലെ വസ്തുതകള്‍ വെളിപ്പെടുത്തുന്നത്. അതിനിടക്കാണിപ്പോള്‍ പെന്‍ഷന്‍ ആനുകൂല്യങ്ങള്‍ നഷ്ടപ്പെടാതിരിക്കാനുള്ള ജീവനക്കാരുടെ “അവകാശ സമര” പ്രഖ്യാപനം !!! ഇവര്‍ക്ക് ഏതു കോത്താഴത്തെ അവകാശമാണ് ഇനി ജനങ്ങളില്‍ നിന്നും പിടിച്ചെടുക്കാനുള്ളത് ? ഗള്‍ഫിലെ മരുഭൂമിയില്‍ വറുത്തെടുക്കുന്ന പ്രവാസി മലയാളികളുടെ ചിലവില്‍ മൂന്നുനേരം ഉണ്ണാന്‍ മാത്രം പ്രാപ്തിയുണ്ടായിരിക്കുന്ന മലയാളിക്ക് ഏതാണ്ട് ഉപയോഗശൂന്യമായ സേവനദാതാക്കളായ സര്‍ക്കാര്‍ ജീവനക്കാര്‍ക്ക് അമേരിക്കയിലോ ഗള്‍ഫിലോ ലഭിക്കുന്ന മികച്ച വേതനവും ആനുകൂല്യങ്ങളും ചോദിക്കാന്‍ എന്ത് ന്യായമാണുള്ളത് ? കഴിയില്ലെങ്കില്‍ രാജിവച്ചു പോടെ എന്നു പറയേണ്ടതിനു പകരം, ഇവരെയൊക്കെ പ്രീണിപ്പിച്ച് പൊതുമുതല്‍ കൊള്ളയടിക്കാനുള്ള പുതിയ അധികാരാവകാശങ്ങള്‍ നല്‍കാനുള്ള രാഷ്ട്രീയ പാര്‍ട്ടികളുടെ ശീലം എതിര്‍ക്കപ്പെടേണ്ടതുണ്ട്.

പെന്‍ഷനും ശമ്പളവും കുറക്കണം

കേരളത്തിലെ പരിധസ്ഥിതിയില്‍ ഒരാള്‍ക്ക് തന്റെ റിട്ടയര്‍മെന്റ് ജീവിതം നയിക്കാന്‍ ഒരു 4000 രൂപയിലധികമൊന്നും ആവശ്യമില്ല, എന്നിരിക്കെ കനത്ത പെന്‍ഷന്‍ വാങ്ങിയാണ് നമ്മുടെ ഏറെക്കുറെ പ്രയോജന രഹിതരായ പെന്‍ഷന്‍കാര്‍ പ്രമാണികളായി വിലസുന്നത്. അതുപോലെത്തന്നെ 6000 രൂപയിലധികം ശമ്പളം ലഭിക്കേണ്ട മലമറിക്കുന്ന ജോലിയൊന്നും ആവറേജ് സര്‍ക്കാരുദ്ധ്യൊഗസ്ഥനെക്കൊണ്ട് ചെയ്യിക്കാനാകില്ല. സമൂഹത്തിനാവശ്യമായ ഒരു ശാസ്ത്ര-സാമൂഹ്യ- സാംസ്ക്കാരിക പരിഹാരമൊന്നും സ്വയം വികസിപ്പിക്കാന്‍ ശേഷിയില്ലാത്ത നമ്മുടെ യൂണിവേഴ്സിറ്റി പ്രഫസ്ര്മാര്‍ക്കും മറ്റും ഒഴിവു സമയങ്ങളില്‍ ഹോട്ടലുകളില്‍ പാത്രം കഴുകാനുള്ള അധിക വരുമാന ജോലികളില്‍ ഇടപെടാന്‍ തോന്നുന്ന വിധത്തിലുള്ള കുറഞ്ഞ ശമ്പളം മാത്രം കൊടുക്കുന്ന ഒരു വ്യവസ്ഥിതി നടപ്പാക്കേണ്ടിയിരിക്കുന്നു. അതായത് ഫലത്തില്‍ സര്‍ക്കാര്‍ ജീവനക്കാരുടെ ശമ്പളം നാലിലൊന്നായെങ്കിലും നിജപ്പെടുത്താതിരിക്കുന്നത് പൊതുജനം വിഢികളും രാഷ്ട്രീയ ബോധമില്ലാത്തവരുമായ അടിമകളായി തുടരാന്‍ ഇടവരുത്തുന്നുണ്ട്.

ശമ്പളം കുറക്കുന്നതിന്റെ പ്രയോജനങ്ങള്‍

നിലവില്‍ 40000 രൂപ ശമ്പളം വാങ്ങുന്ന ഒരു സര്‍ക്കാറുദ്ധ്യോഗസ്ഥന്‍ ജനങ്ങളുടെ ചിലവില്‍ സമൂഹത്തില്‍ ഉപജീവിക്കുന്ന ഒരു പാരസൈറ്റാണെന്നാണ് ചിത്രകാര മതം ! കഴിവുള്ള വ്യക്തിയാണെങ്കില്‍ 10000 ആയി ശമ്പളം കുറച്ചാല്‍ അയാള്‍ പ്രവര്‍ത്തന യോഗ്യമായേക്കും. കാരണം, അര്‍ഹതയില്ലാത്ത പണവും അധികാരാവകാശങ്ങളും നല്‍കുന്ന അലസത അയാളെ വിട്ടൊഴിയേണ്ടതാണ്. ഇങ്ങനെ ലാഭിക്കുന്ന 30000 രൂപയില്‍ 10000 രൂപ ശമ്പളത്തില്‍ ഒരു കഴിവുറ്റ പുതിയ ജീവനക്കാരനെ കൂടി നിയമിച്ച് ജനങ്ങളെ അറ്റന്റു ചെയ്യാന്‍ ആളില്ലാത്ത സര്‍ക്കാര്‍ ഓഫീസുകള്‍ ജന സേവന കേന്ദ്രാങ്ങളാക്കാനും, ശേഷിച്ച 20000 രൂപ കുളവും, കായലും, മാലിന്യമുക്തമാക്കാനും, ഗതാഗതയോഗ്യമാക്കാനും, ശുദ്ധജല പദ്ധതികള്‍ നടപ്പിലാക്കാനും നാടിന്റെ മറ്റു വികസന പദ്ധതികള്‍ക്കും നീക്കിവക്കാനുമാകുന്നു. അതായത് സര്‍ക്കാര്‍ ജീവനക്കാരുടേ എല്ലാവരുടേയും ശമ്പളം നാലിലൊന്നായി കുറക്കുന്നതിലൂടെ ഉപയോഗശൂന്യരും ജനസേവനത്തില്‍ താല്‍പ്പര്യമില്ലാത്തവരുമായ ധനമോഹികാളെ ജനസേവന കേന്ദ്രങ്ങളില്‍ നിന്നും പാലായനം ചെയ്യാന്‍ പ്രേരിപ്പിക്കാനും, ജനാധിപത്യത്തിലും, ജന സേവനത്തിലും താല്‍പ്പര്യമുള്ള ഇരട്ടി പുതിയ പബ്ലിക്ക് സര്‍വന്റ്സിനെ സര്‍വ്വീസില്‍ കൊണ്ടു വരാനും കഴിയും. ഇത് ഇപ്പോഴുള്ള സര്‍ക്കാര്‍ ഉദ്ദ്യ്പ്പ്ഗസ്ഥന്മാരുടെ എണ്ണം ഇരട്ടിയാക്കുകയും അത്രയും പുതിയ തൊഴിലന്വേഷകര്‍ക്ക് സര്‍ക്കാര്‍ തൊഴിലും അധികാര സ്ഥാനങ്ങളിലുള്ള പ്രാതിനിധ്യം നല്‍കാനും കാരണമാകും.

സര്‍ക്കാര്‍ ജോലി സേവനമാക്കുക

പണം കൊണ്ട് നല്ലൊരു ജീവനക്കാരന്റെ ആത്മാര്‍ത്ഥത നേടാനാകില്ല. നമുക്കറിയാം മനുഷ്യ ദൈവങ്ങളുടെ കക്കൂസു കഴുകാനും, ചോറും കറിയും വക്കാനും രണ്ടു മൂന്നു പി എച്ച് ഡി യുള്ള മനുഷ്യസ്നേഹികള്‍ ക്യൂ നില്‍ക്കുന്ന നാടാണ് നമ്മുടേത്. കന്യാസ്ത്രീ മഠങ്ങളും, മിഷനറി സ്ഥാപനങ്ങളും വേശ്യാലയങ്ങളായും കൊലക്കളങ്ങളായും  കുപ്രസിദ്ധി നേടുന്നതിനു മുന്‍പ്  ജന സേവനം ഭാഗ്യമായികണ്ട് ഒട്ടേറെ നല്ല മനുഷ്യര്‍ പ്രതിഫലമില്ലാതെ അവിടങ്ങളില്‍ സേവനമനുഷ്ടിച്ചിരുന്നു. സര്‍ക്കാര്‍ ജോലി ജനങ്ങളെ സേവിക്കാനുള്ള അവസരമാണെന്നും, അതിന് 500 രൂപ മാത്രം മാസ ശമ്പളം (അതും സമയത്തിനു കിട്ടാതെ) സ്വീകരിച്ചുകൊണ്ട് ആദിവാസികളുടേയും മറ്റും മക്കളെ പഠിപ്പിച്ച്  ശമ്പളത്തിനായി മാസക്കണക്കായുള്ള ശമ്പള കുടിശിഖക്ക് പട്ടണത്തിലെ എ.ഇ.ഒ.ഓഫീസുകള്‍ കയറിയിറങ്ങി,  അധ്യാപകരായി നരകയാതനയനുഭവിക്കുന്നവര്‍ നമുക്കിടയില്‍ത്തന്നെയുണ്ട്. സംഘടിതരല്ലാത്തതിന്റെ പേരിലും സമൂഹത്തിന്‍ലെ ഏറ്റവും പാവപ്പെട്ട മനുഷ്യര്‍ക്ക് വേണ്ടിയുള്ള സ്ഥാപനാങ്ങളിലായതിനാലും “തൊഴിലാളി  വര്‍ഗ്ഗ” ന്യായങ്ങള്‍ വിളമ്പുന്ന വിശുദ്ധ പാര്‍ട്ടി പട്ടികളൊന്നും അവര്‍ക്കു വേണ്ടി കുരക്കാറില്ല. അതുകൊണ്ടുതന്നെ, ഇത്തിക്കണ്ണികളായ ഇപ്പോഴത്തെ സര്‍ക്കാര്‍ ജീവനക്കാരില്‍ ഭൂരിപക്ഷത്തിന്റേയും ശമ്പളം അനര്‍ഹമാണ്. സര്‍ക്കാര്‍ ജോലി സ്വീകരിക്കുന്നവര്‍ ഇതൊരു പൊതു ജന സേവനത്തിനുള്ള അവസരമാണെന്ന് കരുതുന്നവരായിരിക്കണം. അവര്‍ക്ക് പണത്തോട് അഭിനിവേശം തോന്നുമ്പോള്‍ വല്ല കച്ചവടമോ വ്യവസായമോ സ്വകാര്യ മേഖല ജോലിയോ തിരഞ്ഞെടുക്കാന്‍ സ്വയം നിര്‍ബന്ധിതരാകുകയും പൊതു ജന സഹായ കേന്ദ്രങ്ങളായ സര്‍ക്കാര്‍ ഓഫീസുകളില്‍ നിന്നും ഇവര്‍ നിഷ്ക്രമിക്കേണ്ടതും പൊതുജന താല്‍പ്പര്യമായി നാം മനസ്സിലാക്കേണ്ടതുണ്ട്. അതിന്റെ ഭാഗമായി സര്‍ക്കാര്‍ ജീവനക്കാരുടെ ശമ്പളം കുറക്കുക എന്ന് അടിയന്തിര ആവശ്യം നേടിയെടുക്കാനായി ഒരു രാഷ്ട്രീയ സാംസ്ക്കാരിക പ്രസ്ഥാനം തന്നെ ഉയര്‍ന്നു വന്നാല്‍ നിലവിലുള്ള നമ്മുടെ സാമൂഹ്യ ജീര്‍ണ്ണതകളെ മറികടക്കാന്‍ ആ വിപ്ലവത്തിനായേക്കുമെന്ന്  പ്രതീക്ഷിക്കുന്നു... സാവധാനം മതി :))


Translate

Followers